«Google»–«Apple» келишуви «OpenAI» амбицияларига жиддий зарба берди
«Google» ва «Apple» ўртасида имзоланган янги стратегик келишув сунъий интеллект бозорида кучлар мувозанатини ўзгартириб, «OpenAI»нинг глобал етакчилик режаларига жиддий хавф солмоқда.
Сунъий интеллект соҳасида узоқ вақт етакчи сифатида қаралиб келинган «OpenAI» учун бозор шароити кескин ўзгарди. «Yahoo Finance»нинг ёзишича, «Google» ўзининг янги «Gemini 3» модели ва «Apple» билан тузилган кўп йиллик ҳамкорлик орқали технологик ташаббусни қўлга олди. Бу келишув «Apple» маҳсулотларида сунъий интеллектнинг келажак архитектурасини айнан «Google» технологиялари белгилаб беришини англатади.
Расмий маълумотларга кўра, «Gemini» моделлари ва «Google»нинг булут инфратузилмаси «Apple» экотизимига чуқур интеграция қилинади. Бу, айниқса, яқин ойларда янгиланиши кутилаётган «Siri» овозли ёрдамчиси учун ҳал қилувчи аҳамиятга эга. «Bloomberg» нашрининг баҳолашича, «Apple» бу ҳамкорлик доирасида «Google»га йилига тахминан 1 млрд доллар тўлайди, гарчи молиявий шартлар расман очиқланмаган бўлса ҳам.
Келишув бозорда дарҳол акс-садо берди. «Google»нинг бош компанияси — «Alphabet» акциялари қимматлашиб, унинг бозор капитализацияси тарихда илк бор 4 трлн доллардан ошди. Таҳлилчилар буни «Google» нафақат ўз қидирув бизнесини ҳимоя қилгани, балки «Android» ва «iOS» платформалари орқали жаҳон смартфонларининг асосий қисмида СИ стандартларини белгилаш имконига эга бўлгани билан изоҳламоқда.
Бу ҳолат OpenAI учун «йирик йўқотиш» сифатида баҳоланмоқда. Уолл-стрит таҳлилчиларига кўра, «Gemini 3»нинг 2025 йил охирида муваффақиятли чиқиши «OpenAI»ни ҳимоя ҳолатига ўтказди. Сэм Алтман «ChatGPT-5.2»ни шошилинч тақдим этган бўлса-да, бозордаги фикрлар рақобатчи модел фойдасига шаклланди.
Мутахассислар «Apple»нинг «OpenAI»dan узоқлашишини фақат технология билан эмас, балки стратегик омиллар билан ҳам боғлайди. «OpenAI»нинг ўз браузерини ишлаб чиқиши ва янги истеъмолчи қурилма лойиҳалари уни «Apple» учун ҳам эҳтимолий рақобатчига айлантирди. Шу билан бирга, катта харажатлар фонида компания даромадлари етарли суръатда ўсмаяпти.
Натижада, «Google–Apple» иттифоқи сунъий интеллект бозорида янги босқични бошлаб бериб, «OpenAI»нинг глобал етакчиликка даъволарини жиддий синов остига қўймоқда.
