Isroil G‘azoda bolalarni ommaviy ochlikka mahkum qilmoqda — BMT

BMTning Bolalar huquqlari bo‘yicha qo‘mitasi 19 may kuni e’lon qilgan bayonotida Isroilning G‘azo sektorida humanitar yordam yetkazilishini sistemali ravishda to‘sib qo‘yishi bolalarni ommaviy ochlik va o‘lim xavfiga duchor etayotganini bildirdi. Bayonotda ta’kidlanishicha, 11 haftalik qamal tufayli oziq-ovqat inqirozi og‘irlashgan, 50 dan ortiq bola ochlikdan halok bo‘lgan va yana ko‘plab bolalar hayot uchun kurashayotgani aytilgan. Agar bu qamal davom etaversa, bolalar o‘limi yanada ortishi mumkin. Qo‘mita xalqaro hamjamiyatni Isroilga bosim o‘tkazib, G‘azo aholisiga oziq-ovqat va dori-darmon yetkazish imkonini qayta tiklashga chaqirdi. BMT ma’lumotiga ko‘ra, kelgusi bir yilda besh yoshgacha bo‘lgan taxminan 71 ming bola o‘ta qo‘rqinchli kamqonlik va tanqislikdan aziyat chekishi mumkin. Bayonotda ovqatlanishga bo‘lgan huquq insonning asosiy huquqlaridan biri ekani va uning hayot huquqi bilan uzviy bog‘liqligi ta’kidlandi. Shuningdek, o‘tgan haftadagi bombardirlovlar vaqtida 100 dan ortiq bola halok bo‘lgani qayd etildi. 2,3 million aholi istiqomat qilayotgan G‘azo 2 martdan buyon to‘liq qamal sharoitida yashamoqda. 19 may kuni hududga faqat beshta insonparvarlik yuklari ortilgan yuk mashinalari kiritilgan. BMTning insoniy yordam rahbari Tom Fletcher bu holatni «okeanga tushgan bir tomchi» deb ta’rifladi.