Линдси Грэҳэм: «Трамп Россияга қарши санкцияларни кучайтиришга изн берди»

АҚШ Сенати аъзоси Линдси Грэҳэмнинг маълум қилишича, президент Доналд Трамп Россия билан ҳамкорлик қилаётган мамлакатларга нисбатан санкцияларни кучайтиришни назарда тутувчи қонун лойиҳасига «яшил чироқ» ёққан. Сенатор бу ҳақда «X» ижтимоий тармоғида баёнот берди.

Грэҳэмнинг таъкидлашича, мазкур қарор президент билан бўлиб ўтган учрашувдан кейин қабул қилинган. Унинг сўзларига кўра, қонун лойиҳаси бўйича овоз бериш жараёни келгуси ҳафтадаёқ бўлиб ўтиши мумкин.

Ушбу ҳужжат бир неча ой давомида республикачилар ва демократлар томонидан биргаликда ишлаб чиқилган. Қонун лойиҳаси Россия билан иқтисодий алоқаларни сақлаб қолаётган давлатларга, айниқса унинг энергетика ресурсларини сотиб олаётган мамлакатларга қарши санкциялар жорий этишни назарда тутади. Сабаб сифатида Москва томонидан Украинадаги урушни тинч йўл билан ҳал этиш бўйича музокаралардан бош тортилгани кўрсатилган.

Линдси Грэҳэмнинг айтишича, ҳужжат қабул қилинса, у президентга арзон Россия нефтини харид қилиб, Кремлнинг ҳарбий салоҳиятини қўллаб-қувватлаётган давлатларга босим ўтказиш имконини беради. У эҳтимолий нишон сифатида Хитой, Ҳиндистон ва Бразилияни тилга олган.

Сенатор, шунингдек, қонун лойиҳаси Сенат ва Вакиллар палатасида кучли икки партияли қўллаб-қувватловга эга бўлишига умид билдирган. Унинг фикрича, сиёсий келишувга эришиш учун шароит ҳозир етарлича пишиб етилган.

Аввалроқ Конгресс раҳбарияти мазкур ҳужжатни овозга қўйишдан тийилиб келган эди. Чунки Трамп маъмурияти Россия нефтининг йирик харидорларидан бири бўлган давлатларга нисбатан тарифлар орқали босим ўтказишни афзал кўрган.

Аввалроқ АҚШ маъмурияти Украина бўйича тинчлик келишуви муваффақияциз ўтса, Россия энергетика секторига қарши янги санкциялар жорий этиш имкониятини кўриб чиқаётгани ҳақида хабар берган эдик.