«Shishadan jinni chiqarib yuborishdi». Putin Ukrainaning hujumlari haqida fikr bildirdi

Kiyev rejimi Rossiya iqtisodiyotini izdan chiqarish maqsadini ochiqchasiga e’lon qilganidan so‘ng javob zarbalariga duch keldi. Bu haqda Vladimir Putin «Vesti» axborot xizmati muxbiri Pavel Zarubinga bergan intervyusida aytdi.

«O‘zlari shishadan jinni chiqarib yuborishdi — bizning fuqarolik korxonalarimizga zarba berishni boshlashdi», — dedi u.

Putinning so‘zlariga ko‘ra, Rossiyaga qarshi tomonlar anchadan beri mamlakatni parchalash va uni iqtisodiy jihatdan zaiflashtirish maqsadini ochiq aytib keladi. Shu sababli Rossiyani «40 kun ichida mag‘lub etish»ga urinish Kiyev va uning G‘arbdagi hamkorlarining navbatdagi tavakkal harakati bo‘lgan.

Uning aytishicha, Rossiyaning javob harakatlari uzoq kuttirmadi. Rossiya Qurolli kuchlari Ukrainaning, jumladan, Kiyevdagi harbiy-sanoat majmuasi korxonalariga zarbalarni kuchaytirdi. Putin bu zarbalar avvalgidan ancha sezilarli va vayronkor bo‘lganini ta’kidladi.

U bu zarbalarni samarali va o‘z vaqtida amalga oshirilgan, deb baholadi. Uning so‘zlariga ko‘ra, ular Ukraina tomonining harbiy texnika va o‘q-dorilarni yetkazib berish, harbiy xizmatchilarni almashtirish hamda qurollarni takomillashtirish imkoniyatlarini cheklamoqda.

«Shubhasiz, bu harbiy natijalarga erishish nuqtayi nazaridan jangovar harakatlarning borishiga bevosita va ijobiy ta’sir ko‘rsatmoqda», — dedi Putin.

Putinning ta’kidlashicha, Rossiya bilan qarama-qarshilikda vaziyatni tubdan o‘zgartiradigan burilish yuz bermagan. Uning aytishicha, Rossiya armiyasi «maxsus harbiy operatsiya»ning belgilangan maqsadlariga to‘liq erishish uchun vazifalarni ishonchli bajarmoqda. Ukraina tomoni esa hech qanday ustunlikka erisha olmagan va yuzaga kelgan vaziyatdan chiqish uchun vositachilar orqali turli xabarlarni yetkazmoqda.

«Hozir bu haqda gapirishni va tafsilotlarga to‘xtalishni istamayman, chunki bu turli yo‘nalishlarda mumkin bo‘lgan kelishuvlarni sinab ko‘rish bilan bog‘liq. Bunday takliflar avval ham yangragan, ammo hozirgi vaziyatda ular o‘ziga xos tarzda taqdim etilmoqda», — dedi Rossiya prezidenti.

Uning so‘zlariga ko‘ra, ehtimoliy kelishuvlar asosida nimalar yotishi mumkinligi haqida hozircha oldindan xulosa qilishga erta. Biroq Putinning urg‘ulashicha, Moskva tomoniga yetkazilayotgan takliflar hozircha «ekzotik» xarakterga ega va Rossiya uchun maqbul emas.