Tojikiston 2029-yilgacha eksport hajmini 3,1 mlrd dollarga yetkazmoqchi

Tojikiston o‘rta muddatli istiqbolda tovarlar eksportini har yili o‘rtacha 5,5 foizga oshirishni rejalashtirmoqda. Bunday ko‘rsatkichlar hukumat tomonidan tasdiqlangan mamlakatning 2027–2029-yillarga mo‘ljallangan asosiy makroiqtisodiy ko‘rsatkichlari prognoziga kiritilgan.

Hujjatga ko‘ra, 2027-yilda eksport hajmi 2,8 milliard dollarni tashkil etishi kutilmoqda — bu 2026-yil uchun prognoz qilingan ko‘rsatkichdan 6,3 foizga ko‘p. 2028-yilda eksport 2,9 milliard dollargacha yoki 4,7 foizga oshishi, 2029-yilda esa taxminan 3,1 milliard dollarga yetib, yana 5,6 foizga o‘sishi mumkin.

Shu bilan birga, hukumat hisob-kitoblariga ko‘ra, kelgusi uch yil ichida import ancha sekin sur’atlarda o‘sadi. 2027-yilda uning hajmi 8,3 milliard dollar bo‘lishi prognoz qilinmoqda — bu o‘tgan yilga nisbatan atigi 0,1 foizga ko‘p. 2028-yilda import deyarli o‘zgarmaydi va 8,3 milliard dollarni tashkil etadi, 2029-yilda esa 8,5 milliard dollargacha yoki 1,9 foizga oshadi.

Shunday qilib, Tojikistonning tashqi savdo aylanmasi 2027-yilda 11,2 milliard dollarni, 2028-yilda 11,3 milliard dollarni, 2029-yilda esa 11,6 milliard dollarni tashkil qilishi mumkin. Tashqi savdo hajmining o‘tgan yilga nisbatan o‘sishi 2027-yilda 1,6 foiz, 2028-yilda 1,2 foiz va 2029-yilda 2,9 foiz darajasida prognoz qilinmoqda.

Statistika agentligi ma’lumotlariga ko‘ra, 2026-yilning birinchi yarmida Tojikistonning tashqi savdo aylanmasi qariyb 6,82 milliard dollarni tashkil etib, o‘tgan yilning shu davriga nisbatan 44,2 foizga oshgan. Eksport 65,4 foizga o‘sib, 1,58 milliard dollarga yetgan. Import esa 38,8 foizga oshib, 5,24 milliard dollarni tashkil etgan. Eksportning sezilarli darajada o‘sishi, avvalo, qimmatbaho va yarim qimmatbaho toshlar hamda metallarning eksport qilinishi bilan bog‘liq bo‘lgan.