Хитой 20 МW'ли денгиз шамол турбинасини ишга туширди
Янги ускуна қуввати ва ўлчамлари бўйича денгиз шамол энергетикасида амалда ўрнатилган энг йирик лойиҳа сифатида қайд этилган.
Хитойнинг Goldwind компанияси дунёда илк бор қуввати 20 MW'га тенг бўлган денгиз шамол электр генераторини ўрнатиб, қайта тикланувчи энергия соҳасида янги рекорд ўрнатди. Ускуна мамлакатнинг шарқий қисмида, Фуцзян соҳиллари яқинида жойлаштирилди ва яқин ойларда электр тармоғига уланиши кутилмоқда.
Мутахассислар ҳисоб-китобига кўра, мазкур генератор йилига 80 миллион kWh'дан ортиқ электр энергияси ишлаб чиқаради. Бу ҳажм тахминан 44 мингта хонадоннинг йиллик электр эҳтиёжини қоплаш имконини беради. Шу билан бирга, у ҳар йили 24 минг тонна кўмир сарфини тежаб, атмосферага чиқадиган углерод гази миқдорини қарийб 64 минг тоннага қисқартиради.
Лойиҳа China Three Gorges Corporation томонидан амалга оширилган. Компания маълумотига кўра, турбинанинг барча асосий компонентлари Хитойнинг ўзида лойиҳаланиб, ишлаб чиқарилган. Бу эса мамлакатнинг юқори технологияли энергетика ускуналари ишлаб чиқаришдаги салоҳияти ошиб бораётганини кўрсатади. Турбинанинг техник кўрсаткичлари ҳам эътиборга лойиқ.
Ротор диаметри 300 метрни ташкил этиб, унинг қамров майдони деярли 10 та стандарт футбол майдонига тенг. Учта парракнинг ҳар бири 147 метр узунликка эга бўлиб, монтаж жараёнида улар 174 метр баландликка аста-секин кўтарилган.
Ўрнатиш ишлари махсус, 2 минг тонна юк кўтариш қувватига эга тўртинчи авлод денгиз кемаси ёрдамида амалга оширилди. Мутахассислар бу турбина нафақат қуввати, балки ишончлилиги ва экстремал об-ҳаво шароитида барқарор ишлаш имконияти билан ҳам соҳада янги стандартларни белгилашини таъкидламоқда.
Сўнгги йилларда Хитой шамол энергетикаси компаниялари қувватни ошириш бўйича жадал суръатда ҳаракат қилмоқда. Goldwind ўтган йили 16 MW'ли сузувчи моделни ўрнатган бўлса, рақобатчи Мингянг компанияси 16,6 MW'ли OceanX турбинасини ишга туширган эди. Шу билан бирга, 20 мегаваттдан юқори қувватга эга айрим моделлар ҳозирча қуруқликда синовдан ўтказилмоқда.
Жаҳон бозорида эса Хитой ишлаб чиқарувчилари турбина қуввати бўйича ғарб рақобатчиларидан илгарилаб кетган. Масалан, Siemens Gamesa 21 MW'ли прототипни Данияда ўрнатган бўлса-да, уни оммавий ишлаб чиқариш муддатлари ҳозирча аниқ эълон қилинмаган.
