To‘qayev boylardan ko‘proq soliq olishni taklif qildi

Qozog‘iston prezidenti Qosim-Jomart To‘qayev xalqqa yo‘llagan murojaatida yirik boylik egalari uchun yuqoriroq soliq stavkasini joriy etish masalasini ko‘rib chiqish vaqti kelganini aytdi. Bu haqda «Tengrinews» xabar berdi.

Ma’lum qilinishicha, prezident Hukumat va Qurultoyga ushbu masalani o‘rganib, tegishli takliflar kiritishni topshirgan.

Yangi soliq hali qabul qilinmagan

To‘qayev taklif qilinayotgan choraning asosiy maqsadi qonuniy ravishda orttirilgan mol-mulkni cheklash emas, balki har bir fuqaroning mamlakat rivojiga munosib hissa qo‘shishini ta’minlash ekanini ta’kidladi.

«Hech kim qonuniy ravishda orttirilgan aktivlarni qandaydir tarzda cheklamoqchi emas. Buning o‘zi Konstitutsiyaga zid bo‘lar edi», — dedi prezident. Uning aytishicha, bu yerda asosiy masala soliqqa tortishda adolatni ta’minlash haqida ketmoqda.

Hozircha yangi stavka aynan qancha bo‘lishi, qaysi miqdordan boshlab fuqaro yirik boylik egasi deb hisoblanishi va bu soliq qaysi aktivlarga tatbiq etilishi aniq ma’lum qilinmagan.

Qozog‘istonda amalda qanday soliq stavkalari bor?

Qozog‘istonda 2026 yil 1-yanvardan boshlab yangi Soliq kodeksi kuchga kirdi. U soliq tizimiga bir qator jiddiy o‘zgarishlar kiritdi, xususan, ayrim daromad turlari uchun progressiv individual daromad solig‘i shkalasi joriy qilingan.

Amaldagi tartibga ko‘ra, yiliga 36 million tengegacha bo‘lgan daromad 10 foizlik stavka bo‘yicha soliqqa tortiladi, undan oshgan qismiga esa 15 foizlik stavka qo‘llanadi.

Soliqlarni raqamlashtirish va yashirin iqtisodiyot

To‘qayev soliqqa tortishda adolatni to‘liq ta’minlash uchun barcha jarayonlar shaffof bo‘lishi zarurligini aytdi.

Uning fikricha, ilg‘or texnologiyalar, jumladan, sun’iy intellektdan foydalanish soliq yig‘imlarini oshirishga, yashirin iqtisodiyotni qisqartirishga va korrupsiya xavflarini keskin kamaytirishga yordam berishi kerak.