To‘qayev va Mirziyoyev Buxoroning mashhur tarixiy yodgorliklarini ziyorat qildi

Qozog‘iston Prezidenti Qosim-Jo‘mart To‘qayev O‘zbekiston Prezidenti Shavkat Mirziyoyev bilan birga Buxoroning mashhur tarixiy obidalarini ko‘zdan kechirdi.

Tashrif doirasida delegatsiya a’zolari Ark qo‘rg‘oni, Poyi Kalon ansambli va Labi Hovuz ansambli kabi dunyoga mashhur me’moriy yodgorliklarni ziyorat qildi. Oliy martabali mehmonga mazkur obidalarning tarixi, me’moriy uslubi va Sharq sivilizatsiyasi taraqqiyotidagi o‘rni haqida batafsil ma’lumot berildi.

Dastlab tashrif Ark qo‘rg‘onidan boshlandi. asrlar davomida Buxoroning siyosiy va ma’muriy markazi bo‘lib xizmat qilgan. Manbalarga ko‘ra, ushbu qal’a Buxoro hukmdorlarining qarorgohi sifatida uzoq vaqt faoliyat yuritgan va bugungi kunda ham shaharning asosiy ramzlaridan biri hisoblanadi.

Shundan so‘ng yetakchilar Poyi Kalon ansambliga tashrif buyurdilar. Bu majmua Markaziy Osiyoning eng ulug‘vor me’moriy ansambllaridan biri bo‘lib, uning markazida joylashgan Kalon minorasi 1127 yilda barpo etilgan. Shuningdek, ansambl tarkibiga Kalon masjidi va Mir Arab madrasasi kiradi.

Tashrif davomida Labi Hovuz ansambli ham ko‘zdan kechirildi. Ushbu majmua Ko‘kaldosh madrasasi, Nodir Devonbegi madrasasi va xonaqohdan iborat bo‘lib, asrlar davomida shaharning ijtimoiy va madaniy hayoti markazlaridan biri bo‘lib kelgan.

Shuningdek, mehmonlarga xalq hunarmandchiligi namunalari, milliy bezak san’ati va me’moriy naqshlarning o‘ziga xos jihatlari namoyish etildi. Buxoroning Buyuk ipak yo‘lidagi yirik ilm-fan, ta’lim va savdo markazi sifatidagi tarixi alohida ta’kidlandi.

Qayd etilishicha, Buxoro nafaqat mintaqada, balki butun islom olamida muhim ma’naviy markaz sifatida tanilgan. Bu yerda ko‘plab qozoq ziyolilari tahsil olgan bo‘lib, ular orasida Mashhur Jusup Ko‘peyev, Nurjon Naushabayev, Shortanbay Qanay o‘g‘li va Sultonmahmut To‘rayg‘irov kabi ma’rifatparvarlar ham bor. Bu holat ikki xalq o‘rtasidagi umumiy madaniy merosning chuqur ildizlarga ega ekanini yana bir bor namoyon etadi.