Senat Trampning Eron bilan urush olib borish vakolatini cheklab qo‘ymoqchi
AQSH Senati Donald Trampning Eronga qarshi harbiy harakatlarini Kongress ruxsatisiz boshlashini taqiqlovchi rezolyutsiya qabul qilmoqchi. Demokratlar vaziyat o‘ta xavfli ekanidan ogohlantirmoqda.
Kelasi hafta AQSH qonun chiqaruvchilari Eron bilan urushni to‘xtatish va prezident Donald Trampni har qanday harbiy harakatlar uchun Kongress ruxsatini olishga majburlovchi rezolyutsiyani qabul qilishga yana urinib ko‘radi. Bu haqda Senatdagi demokratlar yetakchisi Chak Shumer «CNN» telekanaliga ma’lum qildi.
Joriy yilda demokratlar bunday ovoz berishni boshlash uchun allaqachon uch marta harakat qilgan, biroq natija bo‘lmagan. Shumerning ta’kidlashicha, ayniqsa hozirgidek xavfli vaziyatda Kongress o‘z vakolatini qayta tiklashi shart. U hech qaysi prezident, xoh demokrat, xoh respublikachi bo‘lsin, mamlakatni yakka o‘zi urushga tortmasligi kerakligini ta’kidladi.
Shumer Oq uy bilan aloqaga chiqib, prezidentning «bugun tunda butun bir sivilizatsiya halok bo‘ladi» degan tahdidi va sulh e’lon qilinishi orasidagi tahlikali soatlarda o‘z xavotirlarini bildirgan. Biroq u Tramp bilan to‘g‘ridan to‘g‘ri gaplasha olmagan, chunki prezident «band» ekani aytilgan.
Senatorlar Trampning urush borasidagi qadamlarini nafaqat oldindan aytib bo‘lmaydigan, balki o‘ta xavfli deb baholamoqda.
Sulh emas, sarob
Shumer so‘nggi lahzalarda tuzilgan ikki haftalik sulhni keskin tanqid qilib, uni o‘ta «mo‘rt» va strategiyasiz qadam deb atadi. Uning fikricha, bu haqiqiy diplomatik yechim emas.
«Yagona to‘g‘ri yo‘l — uzoq muddatli diplomatik yechimdir. Ikki haftalik sulh hech qanday reja emas», — deb ta’kidladi demokratlar yetakchisi. U hukumatning bu borada aniq bir rejasi yo‘qligidan xavotirda.
Senat vakili bunday qisqa muddatli kelishuvlar mintaqadagi asosiy muammolarni hal qilmasligini va faqat vaqtni cho‘zishga xizmat qilishini qo‘shimcha qildi.
Aniq maqsad yo‘q
Senatorning fikricha, Tramp ma’muriyati Kongressga urushning yakuniy maqsadi haqida hanuzgacha qoniqarli javob bermagan. Birinchi kundan boshlab nimaga erishilmoqchi ekani noma’lumligicha qolmoqda.
«Jadval qanday? Bu qancha inson hayoti va moliyaviy resurslarga tushadi? Unda bu savollarga hech qachon javob bo‘lmagan. Aslida, uning javoblari kundan-kunga o‘zgarib bormoqda», — dedi Chak Shumer.
Demokratlar yetakchisi Trampning bunday rejasiz va kutilmagan harakatlari nafaqat Yaqin Sharq, balki butun AQSH xavfsizligini jiddiy xatar ostiga qo‘yayotganini ta’kidladi.
