Toshkentda yo‘l haqini to‘lamagan 30 mingdan ortiq shaxs javobgarlikka tortildi

2026 yilning yanvar–mart oylari davomida avtobuslarda yo‘l haqini to‘lamaslik bilan bog‘liq 32 450 ta holat aniqlangan.

Bu haqda Transport vazirligi huzuridagi Transport nazorati inspeksiyasi ma’lum qildi. Unga ko‘ra, har bir holat bo‘yicha ma’muriy bayonnomalar rasmiylashtirilib, qoidabuzarlarga nisbatan belgilangan tartibda choralar ko‘rilgan.

Nazorat ishlari

Nazoratchilar tomonidan aniqlangan qoidabuzarlarga nisbatan O‘zbekiston Ma’muriy javobgarlik to‘g‘risidagi kodeksining 144-moddasi 5-qismi asosida ma’muriy choralar qo‘llanmoqda. Nazorat ishlari «Toshkent shahar yo‘lovchi tashishni monitoring va nazorat qilish» davlat muassasasi bilan hamkorlikda amalga oshirilmoqda. Inspektorlar avtobuslarda yo‘l haqini to‘lamasdan harakatlanayotgan yo‘lovchilarni aniqlash maqsadida muntazam reydlar o‘tkazmoqda.

Shu bilan birga, sohada raqamlashtirish jarayonlari joriy etilgan. Xususan, to‘lov tizimi va inspektorlar faoliyati elektron monitoring orqali kuzatilmoqda. Bu esa nazorat tadbirlarini manzilli va samarali tashkil etish imkonini bermoqda.

Ma’lum qilinishicha, yil boshidan buyon 28 ta yo‘nalishda, jumladan 8 ta asosiy yo‘nalishda kuchaytirilgan nazorat o‘rnatilgan. Natijada ushbu yo‘nalishlarda tranzaksiyalar soni oshgani kuzatilgan.

Eslatib o‘tamiz, 2025 yil 1-yanvardan boshlab Toshkent shahridagi avtobus salonlarida naqd pulda to‘lov qilish to‘xtatilgan edi. Yo‘lkirani 10 dan ortiq naqd pulsiz to‘lov usullari orqali to‘lash mumkin: ATTO transport va virtual kartalari, istalgan banklarning UzCard va Humo kontaktsiz kartalari, xalqaro to‘lov tizimlari kartalari (Visa, MasterCard, UnionPay), shuningdek, Click, Uzum, Plum to‘lov ilovalari orqali.

Naqd pulga bir martalik QR kodli chiptalarni sotib olinadi, ular Paynet, Oson va Multipay kompaniyalarining infokiosklari, shuningdek, Paynet oflayn punktlari orqali sotiladi. Bunday chiptalarning narxi 3000 so‘mni tashkil etadi, naqd pulsiz to‘lov uchun esa 1700 so‘m undiriladi.