Туризм ва овқатланишга қайтарилган ҚҚС миқдори маълум қилинди
Қайтарилган ҚҚСнинг асосий улуши 587 та умумий овқатланиш корхонасига тўғри келиб, уларга 25,6 млрд сўм қайтариб берилди.
© Soliq ilovasiЖорий йил бошидан Ўзбекистонда туризм, умумий овқатланиш ҳамда айрим қишлоқ хўжалиги корхоналарига жами 32,3 млрд сўм қўшилган қиймат солиғи (ҚҚС) қайтарилди. Бу ҳақда Солиқ қўмитаси маълум қилди.
Умумий овқатланиш корхоналарига қайтарилган ҚҚС
Маълумотларга кўра, қайтарилган маблағларнинг асосий қисми умумий овқатланиш корхоналари ҳиссасига тўғри келган. Хусусан, 587 та овқатланиш шохобчасига 25,6 млрд сўм ҚҚС қайтариб берилган.
Туризмга қайтарилган ҚҚС
Шунингдек, 15 та туроператорга 273,1 млн сўм ва 99 та меҳмонхонага 1,6 млрд сўм ажратилган. Бу туризм соҳасида фаолият юритаётган тадбиркорларни рағбатлантиришга қаратилган.
Қишлоқ хўжалиги йўналишида эса 28 та чорвачилик ва паррандачилик хўжаликларига 1,1 млрд сўм қайтарилган. Бундан ташқари, 111 та заргарлик корхонасига 3,7 млрд сўм ҚҚС ажратилган.
Мазкур механизм тадбиркорлик субъектларини қўллаб-қувватлаш, солиқ юкини камайтириш ва айрим тармоқларда фаолликни ошириш мақсадида жорий этилган. ҚҚС қайтариш тизими орқали бюджетга тўланган солиқнинг бир қисми тадбиркорларга қайта йўналтирилмоқда.
Эслатиб ўтамиз, Ўзбекистонда 2026 йил 1 январдан бошлаб қишлоқ хўжалиги маҳсулотларини реализация қилишда қўшилган қиймат солиғи бўйича нол ставка жорий этилди. Ушбу тартиб президентнинг 2025 йил 4 сентябрда қабул қилинган «Қишлоқ хўжалиги соҳасида қўшилган қиймат солиғини ҳисоблашнинг соддалаштирилган тартибини жорий этиш чора-тадбирлари тўғрисида»ги фармонида белгилаб қўйилган.
