Ko‘p qavatli uylar yashil hududini betonlashtirganlar jarimaga tortiladi

O‘zbekistonda ko‘p kvartirali uylarga tutash yashil va tuproqli yer uchastkalarini noqonuniy ravishda betonlashtirganlar uchun ma’muriy javobgarlik kuchaytirildi. Yangi qonunga ko‘ra, bunday holatlar uchun jarima belgilanmoqda.

Prezident Shavkat Mirziyoyev tomonidan 25-mart kuni imzolangan qonun atrof-muhitni muhofaza qilish, tabiiy resurslardan oqilona foydalanish va yashil hududlarni asrashga qaratilgan. Ushbu hujjat Ma’muriy javobgarlik to‘g‘risidagi kodeksga bir qator o‘zgartish va qo‘shimchalar kiritadi.

Jarima miqdori

Xususan, kodeksning 159-moddasi yangi to‘rtinchi qism bilan to‘ldirildi. Unga ko‘ra, ko‘p qavatli uylarga tutash yerlarda o‘zboshimchalik bilan beton qoplama qilish yoki turli qurilma va konstruksiyalar o‘rnatish huquqbuzarlik sifatida baholanadi.

Yangi tartibga muvofiq, bunday qoidabuzarlik sodir etgan fuqarolarga bazaviy hisoblash miqdorining 50 baravarigacha — 20 million 600 ming so‘mgacha jarima qo‘llaniladi.

Mansabdor shaxslar uchun esa bu miqdor 100 baravargacha — 41 million 200 ming so‘mgacha yetishi mumkin.

Shu bilan birga, agar qoidabuzar shaxs o‘zboshimchalik bilan qurilgan inshootlar, betonlashtirilgan hududlar yoki o‘rnatilgan konstruksiyalarni ixtiyoriy ravishda bartaraf etsa, u ma’muriy javobgarlikdan ozod qilinishi mumkin.

Qonun 2025 yil sentabr oyida Qonunchilik palatasi tomonidan qabul qilingan bo‘lib, dekabr oyida Senat tomonidan ma’qullangan. Ushbu choralar «yashil iqtisodiyot»ni rivojlantirish va shaharlarda ekologik muhitni yaxshilashga xizmat qilishi kutilmoqda.