Ukrainada o‘lgan o‘zbeklar, «kapot»dagi akvarium va Prezident Administratsiyasidagi islohotlar — 14 iyul dayjesti

Rossiya safida urushgan 66 nafar o‘zbekistonlik halok bo‘ldi Rossiya va Ukraina o‘rtasidagi urushda Rossiya armiyasi safida jang qilgan 66 nafar o‘zbekistonlik halok bo‘ldi. Ulardan ko‘pchiligi qamoqdan ozodlikka chiqish umidi bilan «Vagner» xususiy harbiy kompaniyasi orqali frontga yuborilgan. Shuningdek, Tojikistondan 72, Nepaldan 70, Gurjistondan 63 va Shri-Lankadan 16 kishi halok bo‘lgani qayd etilgan. BBC va «Mediazona» ma’lumotlariga ko‘ra, Rossiya tomonda halok bo‘lgan jangchilarning umumiy soni 118 ming nafardan oshgan. Ular orasida 500 dan ziyod chet el fuqarosi bor. Huquq faollari Rossiya hukumati migrantlarni urushga jalb etish uchun fuqarolik berish, jazodan ozod qilish va tahdidlardan foydalanish holatlarini kuzatmoqda.   Tugatilgan AOKA Prezident Shavkat Mirziyoyev imzolagan farmonga muvofiq, Prezident Administratsiyasida keng ko‘lamli islohotlar boshlandi. Tuzilma yangilanib, 284 ta lavozim qisqartirildi va beshta ustuvor yo‘nalish bo‘yicha (ta’lim, biznes, sud-huquq, tibbiyot, suv resurslari) islohotlar kuchaytirildi. Axborot va ommaviy kommunikatsiyalar agentligi (AOKA) tugatilib, o‘rniga Milliy kontent ishlab chiqaruvchi markaz tashkil etildi. Yangi markaz davlat axborot siyosatida strategik yondashuvni ta’minlash va yuqori sifatli mediamazmun yaratishga mas’ul bo‘ladi.    Mashina kapotida «akvarium»: baliqlar bilan video jazoga olib keldi Ijtimoiy tarmoqlarda avtomobil kapotiga suv to‘ldirib, baliq solingan videorolik katta bahslarga sabab bo‘ldi. Ekologiya vazirligi va IIV tomonidan o‘rganilgan holatda bu ishni Toshkentlik fuqaro I.N. amalga oshirgani aniqlandi. Unga nisbatan hayvonlarga shafqatsiz muomala uchun 1 mln 125 ming so‘m miqdorida jarima belgilab, rasmiy bayonnoma tuzildi. Huquqbuzarning aytishicha, u bu ishning noto‘g‘ri ekanini avval bilmagan va keyin anglab yetkani haqida ma’lum qilgan. Vaqtincha qiziqarli kontent uchun qilingan bu amal ijtimoiy tarmoqlarda keng tanqidga uchradi.   Tojikiston Xitoy–Qirg‘iziston–O‘zbekiston temir yo‘li loyihasiga qo‘shilmoqchi Tojikiston Xitoy orqali Yevropa bilan yuk va yo‘lovchi aloqalarini yo‘lga qo‘yish maqsadida Xitoy–Qirg‘iziston–O‘zbekiston temir yo‘li loyihasida ishtirok etish istagini bildirdi. Bu haqda muzokaralar 2 iyul kuni Tyanszin shahrida SHHT davlatlari transport vazirlari yig‘ilishi doirasida o‘tkazildi. Tojikiston ushbu yo‘nalishni kengroq — Xitoydan Turkiya orqali Yevropagacha cho‘ziluvchi multimodal koridorning bir qismi sifatida ko‘rmoqda.  Loyiha doirasida temir yo‘l tarmoqlari Kashgardan boshlanib, Qirg‘iziston orqali O‘zbekistonga kiradi va Turkmaniston, Eron hamda Turkiya yo‘nalishi bilan Yevropa temir yo‘l tizimiga ulanadi. Tojikiston avval ham shunday yo‘nalishdagi loyihalarda qatnashishga harakat qilgan, ammo Eronning moliyaviy yordami to‘xtagani sababli qurilish to‘xtab qolgan. Yangilanayotgan muzokaralar mamlakat uchun mintaqaviy aloqalarni tiklash imkoniyatini beradi.   Prezident Administratsiyasida katta tayinlovlar: maslahatchilar, vakillar va o‘rinbosarlar belgilandi Prezident Shavkat Mirziyoyevning farmonlari bilan Prezident Administratsiyasida qator yuqori lavozimlarga yangi shaxslar tayinlandi. Departamentlar rahbarlari, Prezident vakillari hamda 5 ustuvor yo‘nalish bo‘yicha rahbar o‘rinbosarlar lavozimlari qayta shakllantirildi. Tayinlanganlar orasida 80 yoshni qarshi olayotgan Zelimxon Haydarov va sobiq maktabgacha ta’lim vaziri Hilola Umarova ham bor. Shu tariqa, Sardor Umrzoqov strategik rivojlanish bo‘yicha maslahatchi, Abdulaziz Komilov tashqi siyosat bo‘yicha, G‘ofurjon Mirzayev kadrlar, Ravshan G‘ulomov iqtisodiy siyosat, Ruslanbek Davletov esa yoshlar va jamiyat bilan aloqalar bo‘yicha maslahatchi etib tayinlandi. Shuningdek, Prezidentning Jahon savdo tashkiloti, tashqi investitsiyalar, energetik xavfsizlik va sport bo‘yicha yangi vakillari tasdiqlandi. Yangilangan tuzilma samaradorlik va mas’uliyatni oshirishga qaratilgan.