АҚШ жаҳон урушига тайёргарлик кўрмоқда — Такер Карлсон
Журналистнинг сўзларига кўра, АҚШ ҳарбий бюджетининг оширилиши янги жаҳон урушига тайёргарликдан далолат беради.
Америка Қўшма Штатлари президенти Доналд Трампнинг 2027 йилда мудофаа бюджетини 1,5 триллион долларгача ошириш ҳақидаги қарори АҚШ янги жаҳон урушига тайёргарлик кўраётганини англатади, деб ҳисоблайди америкалик консерватив журналист Такер Карлсон.
«Президент Пентагон бюджетини бир триллиондан 1,5 триллион долларгача оширилишини эълон қилди... бундай бюджет глобал ёки минтақавий урушга тайёргарлик кўраётган мамлакатга хосдир... кўриниб турибдики, биз жаҳон уруши томон кетмоқдамиз» — деди у ўзининг X ижтимоий тармоғига жойлаган видео материалида.
Карлсоннинг фикрича, АҚШ мудофаа бюджетининг бундай оширилиши учун бошқа сабаб йўқ.
«Яқинда бизни катта уруш кутаётганини тахмин қилиш мумкин ва барча белгилар бунга ишора қилмоқда, жуда яқин орада. Ўйлайманки, буни ҳамма сезиб турибди, гарчи бу содир бўлмаслигига умид қилишса-да, лекин биз шубҳасиз шу йўналишда кетяпмиз... Узр», — дея хулоса қилди у.
Аввалроқ Трамп, «жуда хавотирли ва хавфли даврлар»га ишора қилиб, АҚШнинг 2027 йилги ҳарбий бюджети 1,5 триллион долларни ташкил этиши кераклигини маълум қилган эди.
