«Саломга яраша алик»: Қирғизистонда АҚШ фуқаролари учун виза режимини жорий қилиш таклиф қилинди
«Агар фуқароларимиз учун шундай баланд тўсиқлар қўйилса, биз ўзимизни ҳеч нарса бўлмагандек тута олмаймиз», — деди бош вазир ўринбосари.
Қирғизистон Вазирлар Маҳкамаси раис ўринбосари Эдил Байсалов Вашингтоннинг қирғизистонликларга қўйган янги талабларига жавобан АҚШ фуқаролари учун виза режимини қайта кўриб чиқишни таклиф қилди. Бу ҳақдау Х саҳифасида пост қолдирди.
Байсаловнинг фикрича, виза сиёсати тенг ҳуқуқлилик ва ўзаро ҳурмат тамойилларига асосланиши керак.
«Агар фуқароларимиз учун шундай баланд тўсиқлар қўйилса, биз ўзимизни ҳеч нарса бўлмагандек тута олмаймиз», - дея ёзди у.
Баёнот АҚШнинг виза қоидаларини қаттиқлаштираётгани фонида янгради. 21 январдан бошлаб қирғизистонликлар ва тожикистонликлар виза олиш учун ариза топширганда 5-15 минг АҚШ доллари миқдорида гаров пули қўйишлари керак бўлади.
Маълумот учун: гаров пули талаби 2025 йил август ойида синов тариқасида жорий этилган бўлиб, ушбу синов дастури илк бор 2025 йилнинг августида Малави ва Замбия фуқаролари учун жорий этилган эди. Кейинчалик рўйхат кенгайтирилиб, 2026 йил 1 январдан Туркманистон, энди эса Қирғизистон ва Тожикистонни ўз ичига олган жами 38 та давлатга татбиқ этилди.
Янги тартиб бўйича виза олган фуқаролар АҚШга кириш ва чиқишда фақат белгиланган учта халқаро аэропортдан фойдаланишлари шарт. Булар қаторига Бостондаги Логан, Ню-Йоркдаги Жон Кеннеди ҳамда Вашингтондаги Даллес аэропортлари киритилган. Мазкур чеклов назорат жараёнларини соддалаштириш ва гаров иштирокчиларининг ҳаракатини кузатиш имконини беради.
