АҚШ Россиянинг яна бир танкерини мусодара қилди

АҚШ Соҳил хавфсизлик хизмати Тринидад яқинлигидаги Кариб денгизи сувларида «Olina» танкерини қўлга олди ва зобитлар 9 январ куни кемага чиқиб, назоратни қўлга олган. Бу ҳақда АҚШ расмийларига таяниб, The Wall Street Journal ва Reuters хабар берди.

Қайд этилишича, «Olina» танкерининг рўйхатдан ўтиш рақами илгари санкцияга тушган «Minerva M» кемаси билан бир хил. Ушбу танкер 2025 йилнинг январ ойидаёқ Ғарб давлатлари томонидан Россия нефтини ташишда фойдаланиладиган «соя флоти»нинг бир қисми сифатида қора рўйхатга киритилган эди. Кема Шарқий Тимор байроғи остида ҳаракатланган бўлса-да, амалда Россия манфаатларига хизмат қилиб келган ва халқаро чекловларни четлаб ўтишга уринган.

АҚШ Жанубий қўмондонлиги «Olina» танкерининг қўлга олинганини тасдиқлади. Қўмондонлик операция ҳеч қандай кўнгилсиз ҳодисаларсиз ўтганини таъкидлади.

«Шарқий Тимор байроғи остида ҳаракатланувчи кема охирги марта ўз позициясини 52 кун олдин, ноябр ойининг ўрталарида, Венесуэла қирғоқлари яқинида хабар қилган. Шундан сўнг кема кузатув тизимларини ўчириб, яширин ҳаракатланишга ўтган», - дея ёзган Reuters Vanguard маълумотларига таяниб.

Бу АҚШ ҳукумати томонидан Венесуэладан нефть ташиш билан шуғулланувчи «соя флоти»га қарши ўтказилаётган операциялар давомида мусодара қилинган бешинчи йирик кемадир. Ҳозирда Венесуэла нефть экспортининг қарийб 70 фоизи айнан шундай яширин кемалар ҳиссасига тўғри келмоқда.

Бундан аввалроқ АҚШ ҳарбийлари Атлантика океанида Россия компаниясига тегишли «Bella 1» танкерини ҳам қўлга олган эди. Ўшанда танкер икки ҳафта давомида АҚШ денгиз кучлари таъқибидан қочишга уринган ва ҳатто Россия ҳарбий-денгиз флоти ҳамроҳлигида ҳаракат қилган эди. Россия томони ушбу ҳаракатларни «ноқонуний куч ишлатиш» деб баҳолаб, расмий норозилик билдирган бўлса-да, Вашингтон санкцияларни бузган ҳар қандай кема мусодара қилинишини таъкидламоқда.