Turkmanistonda ko‘chada savdo uchun jarima oshiriladi

Turkmanistonda 1-maydan boshlab qo‘lda savdo qilish yoki xizmat ko‘rsatish uchun belgilanmagan joylarda faoliyat yuritganlik uchun jarimalar oshiriladi, deb xabar berdi «Biznes Turkmenistan».

Prezident Serdar Berdimuhamedov ma’muriy huquqbuzarliklar to‘g‘risidagi kodeksga o‘zgartish va qo‘shimchalar kiritish haqidagi qonunni imzoladi.

Oshgan jarimalar

O‘zgarishlarga ko‘ra, ko‘chalarda, maydonlarda, hovlilarda, uy kirish joylarida va qonunchilikda belgilanmagan boshqa joylarda qo‘lda savdo qilish yoki xizmat ko‘rsatish uchun endi ogohlantirish, tovarlarni bepul musodara qilish yoki 50 dan 100 manatgacha (14-28 dollar) jarima qo‘llanishi mumkin.

Avval bu qoida buzilganda jarima 30 dan 50 manatgacha (8,5-14 dollar) bo‘lgan.

Shuningdek, 1-maydan boshlab spirtli mahsulotlar muomalasi va hujjatlarsiz transport boshqarish uchun ham jarimalar o‘zgaradi. Jismoniy shaxslar uchun markalanmagan iste’mol qadoqidagi alkogolli ichimliklar va tamaki mahsulotlarini sotish, saqlash, tashish yoki sotish maqsadida xarid qilish uchun jarima endilikda 3 dan 5 bazaviy miqdorgacha belgilandi (avvalgi chegara — 5 gacha bo‘lgan).

Turkmanistonda bazaviy miqdor – Vazirlar Mahkamasi tomonidan belgilanadigan va ma’muriy jarimalarni hisoblash uchun qo‘llaniladigan qat’iy pul birligi bo‘lib, hozirgi kunda 100 manatni tashkil etadi. Mansabdor shaxslar uchun jarima 5 dan 10 bazaviy miqdorgacha (142-285 dollar), yuridik shaxslar uchun esa 10 dan 20 bazaviy miqdorgacha (285-571 dollar) oshirildi.

Yangi qoidalar ham kiritildi. Beshinchi qism litsenziyasiz alkogol, pivo, vino materiallari va tamaki mahsulotlarini tayyorlash, sotib olish, saqlash, tashish, jo‘natish va sotish uchun javobgarlik belgilaydi. Bunda jismoniy shaxslarga 6 dan 8 bazaviy miqdorgacha (600-800 manat), yuridik shaxslarga esa 30 dan 50 bazaviy miqdorgacha (3 ming - 5 ming manat) jarima solinadi, tovarni musodara qilish ham mumkin.

Oltinchi qism bir yil ichida takroran huquqbuzarlik sodir etilganda kuchaytirilgan javobgarlikni joriy etadi. Bunda jismoniy shaxslar uchun jarima 10 dan 15 bazaviy miqdorgacha (1 ming-1,5 ming manat), yuridik shaxslar uchun 60 dan 100 bazaviy miqdorgacha (6000-10000 manat) belgilangan bo‘lib, mahsulotni musodara qilish imkoniyati ham mavjud.

Haydovchilik guvohnomasisiz mashina haydash

2026 yil 1-maydan boshlab haydovchilik guvohnomasi yoki ishonchnoma (doverennost) qo‘lda bo‘lmagan holda transport vositasini boshqarganlik uchun jarima 0,5 bazaviy miqdordan 1 bazaviy miqdorgacha oshiriladi.

Ishonchnomasiz boshqarish yoki rulni bunday huquqni tasdiqlovchi hujjati yo‘q shaxsga topshirish uchun avvalgi 2 bazaviy miqdordagi qat’iy jarima o‘rniga endi 2 dan 3 bazaviy miqdorgacha bo‘lgan diapazon belgilangan.

Haydovchilik guvohnomasi umuman yo‘q yoki boshqarish huquqi cheklangan shaxs tomonidan transportni boshqarish uchun jazo kuchaytirilib, 3–5 bazaviy miqdordan 5–8 bazaviy miqdorga oshirildi. Bunday shaxsga transportni berish uchun jarima 4 dan 6 bazaviy miqdorgacha belgilandi.

Shuningdek, birinchi marta alohida tarkib sifatida muddati o‘tgan haydovchilik guvohnomasi yoki vaqtinchalik ruxsatnoma bilan transport boshqarish joriy etildi. Bu holat uchun 3 dan 5 bazaviy miqdorgacha jarima belgilanadi.