Эрон АҚШ билан келишувдан сўнг нефт экспортини қайта тиклади

Эрон ва Америка Қўшма Штатлари ўртасида урушни тўхтатиш бўйича келишувга эришилганидан сўнг, Теҳрон сўнгги икки ой ичида биринчи марта денгиз орқали нефт экспортини қайта тиклади. Бу ҳақда нефтни ташиш ва сақлаш жараёнларини кузатувчи «TankerTrackers» сайти 17 июн куни маълум қилди.

«Х» ижтимоий тармоғидаги сунъий йўлдош суратлари ва геолокация маълумотларига таяниб берилган хабарга кўра, бортида жами 3,8 миллион баррел (604 миллион литр) нефт бўлган Эроннинг «Diona» ва «Hero2» супертанкерлари АҚШ Ҳарбий-денгиз кучларининг денгиз қамали ҳудудини тарк этган. Кейинроқ яна 1 миллион баррель хом нефт ортилган учинчи танкер ҳам ушбу ҳудуддан ўтгани қайд этилган.

Тинчлик шартномаси ва Ҳўрмуз бўғозининг тақдири

Жорий йилнинг феврал ойи охирида АҚШ ва Исроилнинг Эронга берган авиазарбалари оқибатида бошланган можаро 14 июн куни томонларнинг ўт очишни тўхтатиш бўйича келишуви билан тўхтатилди. Мазкур битим бутун минтақада ўт очишни зудлик билан тўхтатишни назарда тутади.

Эрон Ташқи ишлар вазирлиги маълумотларига кўра, Вашингтон уруш бошланиши билан Эрон портларига киритган қамални 16 июнь куни бекор қилган. Келишув шартларига кўра, Теҳрон ва Вашингтон 60 кун ичида якуний тинчлик шартномасини ишлаб чиқиши лозим.

Шу билан бирга, асосан Эрон томонидан ёпиб қўйилган Ҳўрмуз бўғозининг очилиши бўйича томонлар бир-бирига зид баёнотлар бермоқда. АҚШ Президенти Доналд Трамп ушбу муҳим денгиз йўли қайта очилишини ва кемалар ўтиши учун ҳеч қандай тўлов ундирилмаслигини таъкидлаган.

Ўз навбатида, Теҳрон Ҳўрмуз бўғозини «30 кун ичида» очишини ва ундан ўтадиган кемалардан тўлов ундириш ниятида эканини маълум қилмоқда.