Каннаваро: «Футболчиларимдан ғурурланаман»

Ўзбекистон миллий терма жамоаси бош мураббийи Фабио Каннаваро ЖЧ-2026 гуруҳ босқичининг илк турида Колумбияга учралдан 1:3 ҳисобидаги мағлубиятдан сўнг футболчиларини қўллаб-қувватлади ва улар билан фахрланишини таъкидлади.

«Футболчиларимдан ғурурланаман. Улар яхши ўйнашди. Бугун қийин ўйин бўлди. Бундай стадионда, мухлислар қаршисида ўйнаш осон эмас. Лекин бу сизга кўпроқ мотивация бериши ҳам мумкин», — деди Каннаваро.

Мураббийга кўра, жамоа иккинчи бўлимда ўйин ритмини ўзгартира олган ва ташаббусни қўлга олишга ҳаракат қилган.

«Авваламбор, биз Ўзбекистонни бутун дунёга ижобий намойиш этиш учун бу ерга келдик. Мен доим жамоамга ўйин давомида фаол ҳаракат қилиш кераклигини айтиб келаман. Колумбия сингари жамоаларга қарши ўйнаш, тўпсиз ҳаракат қилиш осонмас. Умуман олганда, иккинчи бўлимда яхши ҳаракат қилдик, бироқ, афсуски, гол ўтказиб юбордик», — дейди у.

Италиялик мутахассис учрашув Ўзбекистон футболи тарихида алоҳида ўрин тутишини қайд этди.

«Биз бу стадионда ўтган ушбу ўйинни эслаб қоламиз. Чунки бу тарихий ўйин. Биз Жаҳон чемпионатидамиз. Бугунги ўйин биз учун яхши бўлди, деб айта оламан. Хатолар бўлди, улар устида ишлаймиз», — деди у.

Мураббий Португалияга қарши навбатдаги баҳс олдидан футболчиларни дадилроқ ҳаракат қилишга чақирди.

«Агар ўйнашга журъат топа олмасак, ўйин учун етарлича бўшлиқлар очмасак, бизга қийин бўлади. Иккинчи бўлим анча яхши ўтди ва Португалияга қарши кўпроқ ирода ва жасорат кўрсатамиз, деб умид қиламан. Акс ҳолда, 90 дақиқани ўз майдон ярмингизда ўтказиш жуда қийин», — деди у.

Эслатиб ўтамиз, Ўзбекистон ЖЧ-2026даги илк учрашувида Колумбияга 1:3 ҳисобида мағлуб бўлди. Терма жамоанинг Жаҳон чемпионатлари тарихидаги илк голига Аббосбек Файзуллаев муаллифлик қилди. Ўзбекистон навбатдаги ўйинини 23 июнь куни Португалияга қарши ўтказади.