Ўзбекистон Россиядан дизель импортини қайта тиклади
Марказий Осиё давлатлари Россиядан дизель ёқилғиси харидини оширди. Ўзбекистон ҳам сентябрда импортни қайта тиклаб, 26 минг тонна дизель харид қилинди.
© TASSЎзбекистон 2026-йил сентябр ойида Россиядан 26 минг тонна дизель ёқилғиси импорт қилди. Бу ҳақда «Reuters» агентлиги манбаларга таяниб хабар берди.
Сентябрда Марказий Осиё мамлакатлари Россиядан жами 427 минг тонна дизель ёқилғиси олди. Августда бу кўрсаткич 371 минг тоннани ташкил этган. Шу тариқа, бир ойда импорт ҳажми қарийб 15 фоизга ошди.
«Reuters» маълумотларига кўра, ўсиш Россия бозорида дизель ёқилғиси таклифи ортиб, нархлар пасайгани билан боғлиқ. Россияда дизель захираларининг кўпайиши экспорт учун қўшимча имконият яратган.
Минтақада йирик харидорлар
Россия дизелининг Марказий Осиёдаги энг йирик харидори Монголия бўлиб қолмоқда. Мамлакат сентябрда импортни августдаги 215 минг тоннадан 220 минг тоннага оширди.
Қозоғистон ҳам харидни сезиларли кўпайтирди. Мамлакатга етказиб берилган дизель ҳажми бир ойда 28 минг тоннадан 77 минг тоннага етди. Бу минтақадаги энг катта ўсишлардан бири бўлди.
Айни пайтда, Қирғизистон импорти 72 минг тоннадан 67 минг тоннага, Тожикистонники эса 56 минг тоннадан 38 минг тоннага камайди.
2026 йил январь–сентябрь ойларида Россиядан Марказий Осиёга жами 3 миллион тонна дизель етказиб берилган. Ўтган йилнинг шу даврида бу ҳажм 2,9 миллион тоннани ташкил этган.
Россия бозоридаги ҳолат
«Реутерс» манбалари Россияда дизель ёқилғиси ортиқча таклифга эга эканини билдирган. Шу билан бирга, дронлар ҳужумлари нефтни қайта ишлаш заводлари фаолиятига таъсир кўрсатгани сабабли бензин ишлаб чиқаришда босим сақланиб қолмоқда.
АҚШ президенти Дональд Трамп 9-октябр куни Россия жаҳон бозорига дизель етказиб беришга рози бўлганини айтди. Унинг сўзларига кўра, дастлаб 300 минг тонна ёқилғи етказиб берилиши, кейин эса ҳажм оширилиши мумкин.
«Reuters» хабарида АҚШ маъмурияти Россия ёқилғисига нисбатан санкцияларни вақтинча тўхтатгани ҳам қайд этилган. Бу қарор АҚШда дизель нархлари юқори бўлиб турган пайтда қабул қилинди. Бироқ таҳлилчилар ушбу чора ёқилғи нархларини узоқ муддат пасайтириш учун етарли бўлмаслиги мумкинлигини таъкидлаган.
Эслатиб ўтамиз, аввалроқ Ўзбекистонда йил бошидан буён мамлакатда нефть, кўмир ва газ конденсати қазиб олиш ҳажми ҳам қисқаргаи ҳақида хабар берилганди. Шу билан бирга, автобензин, дизель ёқилғиси, электр энергияси ва портландсемент ишлаб чиқариш ўсган.
