Хантавирус янги пандемияга айланадими? ЖССТ баёнот берди
Маълумотларга кўра, ҳозирга қадар касалликнинг саккизта ҳолати тасдиқланган бўлиб, уларнинг учтаси ўлим билан якунланган.
Жаҳон соғлиқни сақлаш ташкилоти круиз кемасида аниқланган хантавирус ҳолатлари янги пандемия бошланганини англатмаслигини маълум қилди.
Ташкилот экспертлари ҳозирги пайтда жамоат саломатлиги учун хавф даражаси паст эканини ва вазият назорат остида сақланаётганини таъкидлади.
ЖССТ маълумотларига кўра, ҳозиргача касалликнинг саккизта ҳолати тасдиқланган. Уларнинг учтаси ўлим билан якунланган.
Инфекция тарқалиши асосан круиз кемаси билан чекланган деб ҳисобланмоқда. Ҳозирда кемада вируснинг янада кенг тарқалишининг олдини олиш учун кенг қамровли санитария чоралари амалга оширилмоқда.
Вирус қандай юқади?
Ташкилот мутахассислари хантавирус одамдан одамга юқиши учун узоқ вақт давомида яқин мулоқот талаб қилинишини қайд этди.
Бундай ҳолатлар асосан оила аъзолари, яқин шериклар ёки беморларга ёрдам кўрсатаётган тиббиёт ходимлари ўртасида кузатилиши мумкин.
Шу сабабли ЖССТ ҳозирча йирик эпидемия юзага келишини кутмаётганини билдирди.
Маълум қилинишича, биринчи беморда аломатлар 6 апрел куни пайдо бўлган ва у 11 апрел куни вафот этган. Ўша вақтда хантавирус гумон қилинмагани учун таҳлил намуналари олинмаган.
Янги ҳолатлар истисно эмас
Биринчи беморнинг турмуш ўртоғида ҳам касаллик аломатлари кузатилган. У Муқаддас Елена оролида кемани тарк этган ва кейинчалик Йоханнесбургга парвоз вақтида аҳволи оғирлашган. Аёл 26 апрел куни вафот этган.
Учинчи қурбон кемадаги йўловчилардан бири бўлиб, унда аломатлар 28 апрел куни бошланган ва 2 май куни ҳаётдан кўз юмган.
Яна бир касалланган йўловчи 24 апрел куни кема шифокорига мурожаат қилган ва эртаси куни эвакуация қилинган. Ҳозир у жонлантириш бўлимида даволанмоқда.
ЖССТнинг таъкидлашича, Анд хантавирусининг инкубация даври олти ҳафтагача чўзилиши мумкин. Шу боис келгусида янги ҳолатлар аниқланиши эҳтимоли сақланиб қолмоқда. Бироқ ҳозирча халқаро миқёсдаги жиддий хавф қайд этилмаган.
