Норвегияда бензинли машиналар деярли сотилмаяпти
Электр транспорт воситаларини ўзлаштириш бўйича дунёда етакчи бўлган Норвегия январ ва феврал ойиларида ички ёнув двигателли автомобиллар савдосида тарихий минимал даражани қайд этди: электромобиллар бозорнинг мутлақ ҳокимига айланмоқда.
Норвегия Йўл ҳаракати ахборот кенгаши (OFV) маълумотларига кўра, январ ойида мамлакатда атиги 7 та, февралда эса 12 та бензинли автомобил сотилган. Ҳибрид ва та дизель ёқилғисида ишловчи янги автомобиллар салмоғи сал кўпроқ, лекин уларнинг сони ҳам 100 та атрофида рўйхатга олинган.
Бироқ январнинг ўзида аккумуляторли электромобиллар (BEV) савдоси 2000 тадан, яевралда эса 7127 тадан ошган.
2025-йил якунларига кўра, Норвегияда сотилган янги автомобилларнинг 95,9 фоизини электромобиллар ташкил этган эди. Таҳлилчилар бу муваффақиятни юқори углерод солиқлари, давлат томонидан бериладиган субсидиялар ва анъанавий двигателларни босқичма-босқич тўлиқ тўхтатиш стратегияси билан изоҳламоқдалар.
OFV директори Гейр Инге Стоккенинг таъкидлашича, январдаги кўрсаткичлар талаб тўхтаганини эмас, балки янги йил олдидаги солиқ ўзгаришлари натижасида бозор барқарорлашаётганини англатади.
Иккиламчи бозор
Электромобилларга бўлган ўтиш нафақат янги автомобиллар, балки иккиламчи (аввал минилган) машиналар бозорида ҳам яққол сезилмоқда. Маълумотларга кўра, январ ойида ишлатилган электромобиллар савдоси ўтган йилнинг шу даврига нисбатан 22,7 фоизга ошган. Ҳозир Норвегия иккиламчи бозоридаги ҳар тўртта автомобилдан бири электр қуввати билан ишлайдиган транспорт воситасидир.
Норвегия Электр транспорт воситалари ассоциацияси бош котиби Кристина Бунинг сўзларига кўра, «иш ҳали якунланмаган». Ҳозир мамлакат аҳолисининг 2/3 қисми ҳали ҳам ёқилғида юрувчи машиналардан фойдаланмоқда. Шу сабабли 2026-йилда ҳам электромобилларни оммалаштириш бўйича амбицияли режалар давом эттирилади. Бу жараён электр машиналарни нафақат бой қатлам, балки кенг омма учун ҳам қулай ва арзон муқобилга айлантирмоқда.
Глобал тренд
Норвегия етакчиликни сақлаб қолаётган бўлса-да, бошқа давлатлар ҳам бу борада фаоллашган. Данияда электромобиллар савдоси охирги ўн йилда 2 фоиздан 68 фоизгача кўтарилди. Нидерландия, Финляндия, Бельгия ва Швецияда ҳам электромобилларнинг бозордаги улуши 33 фоиздан ошган.
Туркия эса электромобилларни ўзлаштириш тезлиги бўйича Европа Иттифоқига етиб олди ва бозор ҳажми бўйича Норвегияни ортда қолдирди.
Хитойда эса электр ва гибрид автомобиллар савдоси илк бор ички ёнув двигателли машиналар савдосидан ўзиб кетди. Бу глобал миқёсда транспорт тизимининг «яшил» технологияларга ўтаётганидан далолат беради.
