Теҳрон мэри: намойишчилар 50 дан ортиқ масжид ва банкни вайрон қилди

Эрон пойтахти Теҳронда давом этаётган оммавий норозилик намойишлари пайтида намойишчилар 26 та банк ва 25 та масжидни вайрон қилган. Бу ҳақда шаҳар мэри Алиризо Законий маълум қилди. Унинг сўзларини TRT Arabi келтирмоқда.

Законийнинг айтишича, тартибсизликлар давомида 24 та турар жой, икки шифохона ҳам талон-торож қилинган. Шунингдек, 48 та ўт ўчириш машинаси ёқиб юборилган. Мэр жамоат мулкига етказилган зарар учун «чет эллик душманлар»ни айблаб, улар ёшларни қўзғатиб, мамлакатда беқарорлик келтириб чиқараётганини таъкидлади.

Шимолий Хуросон вилояти прокуратураси ҳам алоҳида ҳодиса ҳақида маълум қилди. Баёнотга кўра, турли ҳудудлардан келган провокаторлар прокурор Али Акбар Ҳазинзода ва хавфсизлик ходимлари бўлган автомобиллар колоннасига ўт қўйган. Намойишчилар ўт ўчириш хизматларининг ишига тўсқинлик қилган, натижада прокурор ва унинг қўриқчилари ҳалок бўлган. Ҳокимият ушбу ҳодиса бўйича айбдорларни қидириш учун тергов бошлаган.

Эрондаги норозилик акциялари 28 декабр куни Теҳроннинг асосий бозорида бошланган. Илк кунларда акцияларга дўкон эгалари ва талабалар қўшилиб, миллий валюта курсининг кескин пасайиши ва нархлар ўсишига эътироз билдирган. Кейинчалик намойишлар бошқа шаҳарларга ҳам тарқалган. Намойишлар фонида Марказий банк раиси Муҳаммад Фарзин истеъфога чиққан.

«Human Rights Activists News Agency» маълумотларига кўра, 8 январ ҳолатига тартибсизликлар оқибатида камида 42 намойишчи ва саккиз нафар хавфсизлик ходими ҳалок бўлган, қўлга олинганлар сони 2,2 минг кишидан ошган. Олий раҳбар Али Хоманаий намойишчиларни АҚШ президенти Доналд Трамп манфаатлари учун ҳаракат қилаётганликда айблаган.

7 январ куни «Fox News» Эроннинг Ироқ чегарасига яқин Абданан шаҳри намойишчилар назоратига ўтгани ҳақида хабар берган. Бу ҳақда «National Council of Resistance of Iran» ҳам маълумот тарқатган. Шунингдек, Моликшоҳий шаҳрида ҳам назорат йўқотилгани айтилмоқда.