Meta атом энергетикаси бўйича 3 та компания билан келишувга эришди

Meta компанияси АҚШда атом энергетикаси соҳасида фаолият юритаётган учта компания билан узоқ муддатли электр энергияси хариди бўйича келишувларга эришди. «Reuters» агентлигига кўра, компания 20 йиллик шартномалар асосида Vistra компаниясига тегишли атом электр станцияларидан қувват сотиб олади ҳамда янги турдаги кичик модулли реакторлар лойиҳаларида иштирок этади.

Meta маълум қилишича, келишув доирасида Огайо штатларида жойлашган «Perry» ва «Davis-Besse» атом станциялари, шунингдек, Пенсильваниядаги «Beaver Valley» станциясидан электр энергияси харид қилинади. Бу шартномалар ушбу атом объектларининг ишлаш муддатини узайтириш ва қувватларини кенгайтиришни молиялаштиришга хизмат қилади. Айрим реакторлар 2036 йилгача, «Beaver Valley»даги реакторлардан бири эса 2047 йилгача лицензияга эга.

Компания, шунингдек, кичик модулли реакторлар ишлаб чиқишни режалаштираётган «Oklo» ва «TerraPower» билан ҳамкорлик қилади. «TerraPower» компанияси миллиардер Билл Гейтс томонидан қўллаб-қувватланади. Кичик модулли реакторлар тарафдорлари уларни заводларда тайёрлаш мумкинлиги сабабли келажакда арзонроқ бўлишини таъкидлайди, танқидчилар эса ҳозирча улар иқтисодий самарага эриша олмаслигини айтмоқда.

Meta’нинг глобал сиёсатлар бўйича раҳбари Жоэл Капланнинг таъкидлашича, ушбу келишувлар ва ўтган йили «Constellation» билан тузилган шартнома Meta’ни АҚШ тарихидаги энг йирик корпоратив атом энергияси харидорларидан бирига айлантиради. Режаларга кўра, 2035 йилга бориб компанияга жами 6,6 GW атом қуввати етказиб берилиши мумкин.

«TerraPower» билан келишув Meta’га 2032 йилдан бошлаб 690 мегаватт қувват ишлаб чиқарадиган икки реактор лойиҳасини қўллаб-қувватлаш имконини беради. Шунингдек, 2035 йилгача яна олтита реактордан энергия олиш ҳуқуқи ҳам кўзда тутилган. «Oklo» билан ҳамкорлик эса Огайода 2030 йилга қадар 1,2 гигаватт қувват яратишни мақсад қилган.