Тошкентда Европа Иттифоқи фестивали ўтказилади
Пойтахтдаги Ёшлар ижод саройида 2 май куни Европа кунига бағишланган фестивал ўтказилиб, унда таълим, маданият ва халқаро имкониятлар тақдим этилади.
© enjourney.ruТошкент шаҳрида 2 май куни Европа Иттифоқи фестивали бўлиб ўтади. Бу ҳақда Европа Иттифоқининг Ўзбекистондаги делегацияси матбуот хизмати хабар берди. Тадбир Европа куни муносабати билан ташкил этилмоқда.
Фестивал пойтахтдаги Ёшлар ижод саройида (Мустақиллик шоҳ кўчаси, 2-уй) соат 11:00 дан 16:00 гача давом этади. Кириш барча учун бепул бўлиб, кенг жамоатчилик иштирок этиши мумкин.
Тадбир доирасида Европа Иттифоқига аъзо давлатлар элчихоналари, халқаро лойиҳалар ва таълим дастурлари вакиллари иштирок этади. Меҳмонлар улар билан бевосита мулоқот қилиш, саволлар бериш ва Европа давлатларида таълим олиш ҳамда стажировка имкониятлари ҳақида батафсил маълумот олиш имконига эга бўлади.
Фестивалнинг асосий мақсади
Фестивал дастурининг алоҳида қисми сифатида иштирокчилар Европа мамлакатлари билан «жонли формат»да танишишлари мумкин. Элчихоналар ўз мамлакатларининг туризм салоҳияти, таълим тизими ва маданий ранг-баранглигини тақдим этади. Дастурда адабий ўқишлар, рақс маҳорат дарслари, викториналар ва норасмий мулоқотлар ҳам ўрин олган.
Тадбир барча ёш тоифалари учун мўлжалланган. Болалар ва катталар учун интерактив зоналар, кўнгилочар чиқишлар ҳамда махсус тайёргарлик талаб этмайдиган фаолиятлар ташкил этилади. Бу фестивал орқали ташриф буюрувчилар Европа маданияти ва имкониятлари билан яқиндан танишиш имконига эга бўлади.
