Туркманистон нефт-газ соҳасида Малайзия билан ҳамкорлик қилади

Туркманистон ва Малайзия нефт-газ соҳасидаги ҳамкорлик, жумладан Ашхободнинг Малайзия давлат нефт-газ компанияси PETRONAS билан узоқ муддатли шериклиги масалаларини муҳокама қилди. Бу ҳақда Туркманистон Ташқи ишлар вазирлиги маълум қилди.

ТИВ маълумотига кўра, бу масала Туркманистон ташқи ишлар вазири Рашид Мередовнинг Малайзиянинг мамлакатдаги элчиси Мохд Сухайми бин Аҳмад Таджуддин билан учрашувида кўриб чиқилган.

Таълимдаги ҳамкорлик

Томонлар таълим соҳасидаги ҳамкорлик самарадорлигини ҳам қайд этган. Хусусан, туркман талабалари Малайзия университетларида таҳсил олмоқда, PETRONAS технология университети билан барқарор алоқалар сақланмоқда, шунингдек, техник ҳамкорлик бўйича Малайзия ташаббуслари доирасида мутахассислар тайёрлаш дастурлари амалга оширилмоқда.

Компания асосий фаолиятидан ташқари инсон капитали узоқ муддатли ривожига ҳам катта эътибор қаратади. Жумладан, PETRONAS таълим грантлари дастури (PESP) орқали иқтидорли талабаларни маҳаллий ва халқаро етакчи университетларда, шу жумладан ўзининг PETRONAS технология университетида ўқишини молиялаштиради.

Аввалроқ Туркманистон таълим вазири Жумамират Гурбангелдиев ва Малайзия элчиси Мохд Сухайми бин Аҳмад Таджуддин нефт-газ соҳаси учун юқори малакали мутахассислар тайёрлаш бўйича ҳамкорликни кенгайтиришни муҳокама қилган эди.

Бошқа масалалар

Учрашув давомида икки томонлама ҳамкорликнинг кенгроқ йўналишлари ҳам кўриб чиқилди, жумладан сиёсий-дипломатик алоқалар, савдо-иқтисодий ҳамкорлик ва маданий-гуманитар боғланишлар.

Шунингдек, икки мамлакат ўртасида бўлажак юқори даражадаги учрашувларга тайёргарлик масалалари ҳам муҳокама қилинди.

Қайд этилишича, PETRONAS – Малайзиянинг давлат нефт-газ корпорацияси бўлиб, Жануби-Шарқий Осиёдаги энг йирик энергетика компанияларидан бири саналади. У 100 дан ортиқ мамлакатда углеводородлар қиймат занжири бўйлаб комплекс фаолият юритади.