Янги iPhone 18 моделларини Ўзбекистонга олиб кириш қанчага тушади?

Apple янги iPhone 18 Pro ва iPhone 18 Pro Max моделларини 256 GB хотирали версиядан таклиф қилмоқда. АҚШда уларнинг бошланғич нархи мос равишда 1 минг 200 ва 1 минг 300 доллар этиб белгиланган. Компаниянинг илк букланадиган смартфони iPhone Duo эса 256 GB хотирали версияси 2 минг доллардан бошланади.

Аммо АҚШдаги нарх Ўзбекистонда ҳам амал қилади дегани эмас. Қурилмани четдан олиб киришда божхона тўлови, расмийлаштириш йиғими ва IMEI рўйхатдан ўтказиш харажатлари ҳисобига нарх янада қимматлашади.

1000 долларлик божсиз лимит қандай ишлайди?

Ҳаво транспорти орқали Ўзбекистонга кираётган жисмоний шахс ўз эҳтиёжи учун 2 тагача мобил қурилма олиб кириши мумкин. Бунда 1000 долларлик божсиз лимит амал қилади.

Телефон нархи ушбу суммадан ошса, 30 фоизлик бож бутун қийматга эмас, лимитдан ошган қисмига ҳисобланади.

Масалан, iPhone 18 Pro’нинг нархи 1 минг 200 доллар бўлса, 1000 долларлик божсиз лимитдан ошган 200 долларига 30 фоиз бож олинади. Бу 60 долларни ташкил этади. Шундай қилиб, телефон учун жами 1260 доллар тўланади.

iPhone 18 Pro Max учун бу сумма 1 минг 390 доллар, iPhone Duo учун эса 2 минг 300 долларни ташкил қилади.

^{Жадвалдаги суммаларга божхона йиғими ва IMEI тўлови киритилмаган.}

Божхона ва IMEI учун қанча тўланади?

Телефонни божхона орқали расмийлаштириш учун 110 минг сўм (БҲМнинг 25 фоизи миқдорида) божхона йиғими тўланади. Бундан ташқари, мобил қурилманинг IMEI рақамини 30 календар куни ичида рўйхатдан ўтказиш учун 88 минг сўм (БҲМнинг 20 фоизи миқдорида) тўлов бор.

Масалан, iPhone 18 Pro’нинг 1 минг 200 долларлик нархига 60 доллар бож қўшилгач, телефон ва божнинг жами 1 минг 260 долларни ташкил қилади. Шунингдек, замонавий iPhone'лар ва янги букланувчи модел иккита фаол алоқа модулига (SIM + eSIM) эга бўлгани сабабли, уларнинг иккала IMEI рақамини рўйхатдан ўтказиш 176 минг сўмга тушади.

Бунга қўшимча равишда 110 минг сўмлик божхона йиғими ҳамда 176 минг сўмлик IMEI тўлови тўланади.

Умумий ҳисобда телефон ва божнинг ўзи 1 минг 260, божхона йиғими ва IMEI эса унга қўшимча 286 минг сўм тўлови мавжуд.

Худди шу 286 минг сўмлик қўшимча тўлов iPhone 18 Pro Max ва iPhone Duo учун ҳам алоҳида ҳисобланади.

Декларация қилинмаса, бож тўлиқ нархдан ҳисобланади

Телефонни четдан олиб киришда уни божхонада декларация қилиш муҳим. Агар декларация қилинмаса, 1000 долларлик божсиз лимит қўлланмаслиги мумкин. Бундай ҳолатда 30 фоизлик бож телефоннинг тўлиқ қийматидан ҳисобланади.

Шунда учта модел бўйича бож миқдори ҳам ошади: iPhone 18 Pro учун 360 доллар, iPhone 18 Pro Max учун 390 доллар, iPhone Duo учун эса 600 доллар.

^{Жадвалдаги суммаларга божхона йиғими ва IMEI тўлови киритилмаган.}

Шундай қилиб, 1000 долларлик лимит қўлланган ҳолат билан солиштирганда, телефоннинг тўлиқ қийматидан бож ҳисобланганида iPhone 18 Pro учун 300 доллар, Pro Max учун 300 доллар ва Duo учун 300 доллар кўпроқ тўланади.

Натижада, божхона тўловлари ҳисобга олинганда iPhone 18 Pro учун асосий харажат 1 минг 260 ёки 1 минг 560 доллар, iPhone 18 Pro Max учун 1 минг  390 ёки 1690 доллар, iPhone Duo учун эса 2 минг 300 ёки 2 минг 600 доллар бўлади.

Ҳар икки ҳолатда ҳам бунга қўшимча равишда 286 минг сўмлик божхона йиғими ва IMEI тўлови мавжуд.

Агар телефон Ўзбекистондаги дўконлардан харид қилинса, унинг нархи четдан олиб кирилгандаги ҳисобдан бироз қимматроқ бўлиши мумкин. Чунки дўконлар нархга етказиб бериш харажатлари, кафолат хизмати ва ўз устамасини ҳам қўшади.

Шу ҳисобда дастлабки нархлар тахминан қуйидагича бўлиши кутилмоқда:

● iPhone 18 Pro 256 GB — 1 400–1 650 доллар;

● iPhone 18 Pro Max 256 GB — 1 550–1 800 доллар;

● iPhone Duo 256 GB — 2 500–2 850 доллар.

Янги iPhone моделлари савдога чиққач, бозордаги талаб ва таклифга қараб уларнинг нархи ўзгариши мумкин.

Эслатиб ўтамиз, аввалроқ Apple компанияси iPhone 18 Pro ва Pro Max моделларини тақдим этгани ҳақида хабар берган эдик. Янги смартфонларда 2 нанометрли А20 Pro чипи, такомиллаштирилган камера, узоқроқ ишлайдиган батарея ва 15 дақиқада 50 фоизгача қувватлаш имконияти пайдо бўлган. Ҳар иккала модел 18-сентабрдан сотувга чиқади.