Chiqindidan qarzi bor 152 ming abonentning elektr to‘loviga cheklov qo‘yildi
Maishiy chiqindi xizmatlaridan qarzdor minglab iste’molchilarga nisbatan elektr energiyasi to‘lovlariga vaqtinchalik cheklovlar joriy etildi.
O‘zbekistonda maishiy chiqindi xizmatlaridan qarzdori mavjud 152 mingga yaqin abonentning elektr energiyasi uchun to‘loviga vaqtinchalik cheklov o‘rnatildi. Bu haqda Chiqindilarni boshqarish va sirkulyar iqtisodiyotni rivojlantirish agentligi ma’lum qildi.
Ogohlantirish va to‘lovlar
16-yanvar holatiga ko‘ra, 87,5 mlrd so‘m debitor qarzdorlikka ega 873 990 ta abonentga SMS orqali ogohlantirish yuborilgan. Shundan so‘ng, qarzni bartaraf etish uchun iste’molchilarga besh kunlik muddat berildi. Ushbu davr mobaynida 7,4 mlrd so‘m miqdorida to‘lov amalga oshirildi.
Cheklov qo‘llangan abonentlar
Belgilangan muddatda qarzini to‘lamagan iste’molchilarga nisbatan elektr energiyasi to‘lovlariga cheklov joriy etildi. Mamlakat kesimida 151 202 ta abonentning 14,8 mlrd so‘mlik maishiy chiqindi xizmatlari bo‘yicha qarzi mavjudligi aniqlandi va aynan shu toifadagi iste’molchilarga cheklov qo‘llanildi.
Mazkur tizimning joriy etilishi
Ma’lumot uchun, 1-noyabrdan boshlab Toshkent shahrida chiqindi tashish bo‘yicha qarzdorlik mavjud bo‘lganda elektr energiyasi to‘lovlariga cheklovlar kuchga kirgan. Birinchi haftada 25,1 ming nafar abonent 2,24 mlrd so‘mlik qarz haqida ogohlantirilgan bo‘lsa, ularning 6 ming nafari muddat tugagach cheklovlarga duch kelgan.
Yangi tizim dekabr oyidan butun respublika bo‘ylab joriy etildi. O‘shanda 231 ming abonent 20,1 mlrd so‘mlik qarzdorlik bo‘yicha ogohlantirish olgan, dastlabki besh kunda esa 9,4 mlrd so‘m to‘langan. Cheklovlar faqat 2025 yil 1-iyuldan keyin to‘plangan chiqindi qarzlariga taalluqli. Qarzdorlar haqidagi ma’lumotlar har oyning 3 sanasiga qadar «Toza Makon» tizimidan «HET Billing»ga uzatiladi.
