Эрдўған НАТО етакчиларига исмлари ёзилган тўппонча совға қилди
Анқарадаги НАТО саммити якунланганидан сўнг Европа давлат раҳбарлари юклари орасидан кутилмаган совға — тўппонча ва ўқ-дориларни топди.
Туркия президенти Ражаб Тоййиб Эрдўған НАТО саммитида иштирок этган давлат раҳбарларига ноодатий совға тақдим этди. У ҳар бир етакчига Туркияда ишлаб чиқарилган коллекцион тўппонча ва ўқ-дорилар берди.
«Reuters» нашрининг ёзишича, бу орқали Эрдўған Туркия мудофаа саноати имкониятларини намойиш этишни мақсад қилган.
Литва президенти Гитанас Науседа идораси тарқатган суратларда совға қилинган қурол 1990 йилларда Туркиянинг «MKE» компанияси томонидан ишлаб чиқарилган «Gumusay .357 Magnum» тўппончаси экани кўринган.
У Туркия байроғи ва НАТО логотипи туширилган ёғоч қутига жойланган бўлиб, ичига турк ва инглиз тилларида «Gumusay — мамлакатимизда ишлаб чиқарилган биринчи револвер типидаги тўппонча» деган ёзувли тахтача ҳам илова қилинган.
Дипломатик совға
Испания бош вазири Педро Санчеснинг матбуот котиби барча етакчиларга бир хил моделдаги тўппонча берилганини маълум қилди. Ҳар бир қуролга уни қабул қилган раҳбарнинг исми ўйиб ёзилган.
Белгия бош вазири Барт Де Вевер совғани Брюссел аэропорти полициясига сақлаш учун топширган.
Британия бош вазири Кир Стармерга берилган тўппонча эса тозалаш тўплами ва 500 та ўқ билан бирга тақдим этилган.
Айрим етакчилар совғани музейларга топширишга қарор қилган. Хусусан, Европа комиссияси раҳбари Урсула фон дер Ляйен револверни ҳарбий музейга беришишни режалаштирмоқда.
Туркия қурол бозори
«Reuters»нинг қайд этишича, Туркиянинг замонавий қуролсозлик саноати асосан ярим автоматик тўппончаларга ихтисослашгани сабабли, «Gumusay» коллексионерлар учун ўзига хос топилмага айланади.
Таъкидланишича, турк қуролсозлари арзон тўппонча ва милтиқлар билан Европанинг фуқаролик ўқотар қуроллари бозорига кириб бориб, азалдан қимматбаҳо спорт ва хизмат қуроллари билан танилган Италия ҳамда Белгиянинг қадимий брендларига жиддий рақобат туғдирмоқда.
Женевада жойлашган «Small Arms Survey» ташкилоти маълумотларига кўра, Туркия 2019–2024 йиллар оралиғида АҚШ ва Италиядан сўнг дунёда енгил ўқотар қуроллар экспорти бўйича учинчи ўринни эгаллаган. Бу давр мобайнида экспортнинг умумий ҳажми қарийб 3 миллиард долларни ташкил этган.
