Tojikiston neft mahsulotlari va suyultirilgan gaz narxlari ustidan nazoratni kuchaytiradi

Tojikiston chakana savdo do‘konlarida neft mahsulotlari va suyultirilgan gaz narxlari ustidan nazoratni kuchaytirishni rejalashtirmoqda.

Dushanbeda Iqtisodiy rivojlanish va savdo vaziri Abdurahmon Abdurahmonzoda raisligida Makroiqtisodiy siyosatni amalga oshirishni muvofiqlashtirish va potensial xavflarning milliy iqtisodiyotga ta’sirini oldini olish bo‘yicha idoralararo shtab yig‘ilishi bo‘lib o‘tdi.

Yig‘ilishda iste’mol bozorini yoqilg‘i bilan ta’minlash va uning narxlarini tartibga solish asosiy mavzu sifatida qaraldi.

Iqtisodiy rivojlanish vazirligi ma’lumotlariga ko‘ra, yig‘ilish ishtirokchilari ichki bozorni neft mahsulotlari va suyultirilgan gaz bilan ta’minlashni yaxshilash masalalarini muhokama qilishdi. Shuningdek, neft mahsulotlari va xom neft importini diversifikatsiya qilish choralari muhokama qilindi.

Rasmiylar mahalliy ishlab chiqarish korxonalarida qayta ishlash uchun xom neftni import qilish imkoniyatini ko‘rib chiqmoqdalar. Bundan tashqari, uchrashuvda muqobil imkoniyatlardan foydalanishga va mamlakatning yoqilg‘i-energetika resurslariga bo‘lgan ehtiyojini kamaytirishga yordam beradigan infratuzilma loyihalari muhokama qilindi.