12 ta kompaniya ustun muzokara kuchiga ega deb topildi

Raqobat qo‘mitasi ustun muzokara kuchiga ega kompaniyalar ro‘yxatini kengaytirib, unga yana 12 ta xo‘jalik yurituvchi subektni kiritdi. Qo‘mita ma’lumotiga ko‘ra, mazkur kompaniyalar maishiy chiqindilarni yig‘ish va olib chiqib ketish hamda temir yo‘l liniyalaridan foydalanish xizmatlari bozorida faoliyat yuritadi.

Ro‘yxatga kiritilgan korxonalar

Ro‘yxatga kiritilgan kompaniyalarning bir qismi Toshkent viloyatida maishiy chiqindilarni yig‘ish va olib chiqib ketish xizmatlarini ko‘rsatadi. Jumladan, «Zangiota Obodon» MCHJ, «Rahnamo Servis» MCHJ hamda «Angren Bunyod Fayz» MCHJ ushbu hududda faoliyat olib boradi. Ushbu korxonalar xizmat ko‘rsatayotgan hudud va bozor sharoitida bitim shartlariga ta’sir ko‘rsatish imkoniyatiga ega deb topilgan.

Farg‘ona viloyatida esa «Maxsus Garant Avto Servis» MCHJ hamda «Vodiy Maxsus Sanitar Trans» MCHJ maishiy chiqindilarni yig‘ish va tashish xizmatlari bo‘yicha ustun muzokara kuchiga ega kompaniyalar sifatida qayd etildi. Qo‘mita bahosiga ko‘ra, mazkur subyektlar o‘z segmentida sezilarli bozor ta’siriga ega.

Surxondaryo viloyatida ushbu ro‘yxatga kiritilgan kompaniyalar soni ko‘pchilikni tashkil etdi. Xususan, «Surxondaryo viloyati Toza Hudud» davlat muassasasi, «Bio Texno Eko» MCHJ, «Bio-Tex-Eko» MCHJ, «Qiziriq-Invest» MCHJ hamda «Sale Kingdom» MCHJ maishiy chiqindilar bilan bog‘liq xizmatlarda ustun muzokara kuchiga ega deb topildi.

Shuningdek, temir yo‘l liniyalaridan foydalanish xizmatlari bo‘yicha «Petromaruz Uzbekistan» MCHJ va «Ulug‘bek Yangiyer Qurilish» MCHJ ham mazkur maqomga ega bo‘ldi.

Ustun muzokara kuchiga ega kompaniyalar ro‘yxati bilan bu yerda tanishishingiz mumkin.

Ma’lumot uchun: «Raqobat to‘g‘risida»gi Qonunning 14-moddasiga ko‘ra, ustun mavqega ega bo‘lmagan xo‘jalik yurituvchi subekt yoki shaxslar guruhi tomonidan bitim shartlari, tovarlar sotiladigan hudud yoki narxga bir tomonlama ta’sir ko‘rsatish imkoniyati mavjud bo‘lsa, bunday holat ustun muzokara kuchi deb e’tirof etiladi.