2025 yilda O‘zbekistonda uy-joy narxi qancha bo‘ldi?

2025 yil yakunlariga ko‘ra, O‘zbekiston ko‘chmas mulk bozorida faollik sezilarli darajada oshdi va bu jarayon hududlar kesimida turlicha dinamika bilan namoyon bo‘ldi. Iqtisodiy tadqiqotlar va islohotlar markazi tahlillariga asosan, yil davomida uy-joy oldi-sotdi bitimlari soni 295 mingtaga yetgan va o‘tgan yilga nisbatan 15 foizdan ortiq o‘sish qayd etilgan.

Hududlar kesimida bitimlar dinamikasi

Hududlar kesimida bozor faolligi ayniqsa Buxoro, Sirdaryo va Samarqand viloyatlarida yuqori bo‘ldi. Ushbu hududlarda yillik o‘sish sur’atlari mos ravishda 25,7, 23,3 va 19,7 foizni tashkil etdi. Shu bilan birga, respublika bo‘yicha barcha uy-joy oldi-sotdi bitimlarining taxminan 30 foizi Toshkent shahri hissasiga to‘g‘ri keldi. Poytaxtda bitimlar hajmi 18,2 foizga o‘sib, 84 ming atrofida shakllandi.

Bozorda narxlar o‘sishi

Ikkilamchi uy-joy bozorida narxlar dinamikasi ham mo‘’tadil tezlashish bilan ajralib turdi. Respublika bo‘yicha o‘rtacha yillik o‘sish 7,9–8 foiz atrofida bo‘lib, 2024 yildagi 6,2 foizli ko‘rsatkichdan yuqori natija qayd etildi. Ayniqsa, Surxondaryo viloyatida yillik o‘sish 19,5 foizga yetdi. Farg‘ona viloyatida bu ko‘rsatkich 15,5 foizni, Qoraqalpog‘iston Respublikasida esa 15,6 foizni tashkil etdi.

Eng qimmat narxlar

Narxlar darajasi bo‘yicha eng qimmat ikkilamchi uy-joylar an’anaviy ravishda Toshkent shahrida saqlanib qoldi. Poytaxtda bir kvadrat metrning o‘rtacha qiymati 1104 dollarni tashkil etib, yillik o‘sish 0,6 foiz bo‘ldi. Samarqand viloyatida o‘rtacha narx 834 dollar, Toshkent viloyatida esa 682 dollarga tenglashdi. Bu hududlar infratuzilma va investitsion jozibadorlik nuqtai nazaridan yetakchi bo‘lib qolmoqda.

Eng arzon narxlar

Eng past narxlar Qoraqalpog‘iston Respublikasida kuzatilib, bir kvadrat metr uchun o‘rtacha 378 dollarga teng bo‘ldi. Shuningdek, Sirdaryo va Qashqadaryo viloyatlarida ham nisbatan arzon uy-joylar saqlanib qolib, o‘rtacha qiymat 450–460 dollar atrofida shakllandi. Umuman olganda, 2025 yil ko‘chmas mulk bozorida barqaror o‘sish, hududiy tafovutlar va segmentlar bo‘yicha turli sur’atlarni namoyon etgan yil sifatida baholanmoqda.

Poytaxtda ko‘chmas mulk bozoridagi vaziyat

2025 yil davomida Toshkent shahrining ikkilamchi uy-joy bozorida narxlar deyarli barqaror saqlandi. Yil yakuniga kelib, bir kvadrat metrning o‘rtacha qiymati 0,6 foizga oshib, 1100 dollardan yuqori darajada shakllandi. Shu bilan birga, poytaxtning ayrim hududlarida narxlar pasayishi ham kuzatildi.

Xususan, Mirzo Ulug‘bek va Chilonzor tumanlarida ikkilamchi uy-joy narxlari taxminan 5 foizga kamaydi. Birlamchi bozorda esa vaziyat ancha faol bo‘lib, yangi qurilgan uy-joylar narxi yil davomida o‘rtacha 9 foizdan ortiq o‘sdi. Eng yuqori o‘sish sur’atlari Mirobod tumanida 18 foizni, Yashnobod tumanida 14 foizni hamda Mirzo Ulug‘bek tumanida 13,5 foizni tashkil etdi. Bu holat poytaxtda yangi turar joylarga talab yuqori bo‘lib qolayotganini ko‘rsatadi.