2026-yilda katta ekranli eng yaxshi smartfonlar reytingi e’lon qilindi
«Tom’s Guide» 2026-yil uchun katta ekranli eng yaxshi smartfonlarni tanladi, reytingga «Samsung», «Apple», «OnePlus» va «Google» flagmanlari kiritildi.
Mashhur «Tom’s Guide» texnologik nashr 2026 yil uchun katta ekranli smartfonlarning yangilangan reytingini e’lon qildi. Ro‘yxatga ekran diagonali taxminan 6,7 dyuym va undan katta bo‘lgan, video tomosha qilish, o‘yinlar va ish jarayonlari uchun mo‘ljallangan qurilmalar kiritilgan.
Reytingda birinchi o‘rinni «Samsung» kompaniyasining «Galaxy S25 Ultra» modeli egalladi. Mutaxassislar ushbu smartfonni universal flagman deb baholadi: 6,9 dyuymli yorqin displey, yuqori ish unumdorligi va ilg‘or kameralar kombinatsiyasi uni reyting peshqadamiga aylantirgan.
Qurilmaning «S Pen» stilusini qo‘llab-quvvatlashi esa uni yozuv, eskiz va ijodiy ishlar uchun ham qulay qiladi. Shu jihatlari «Galaxy S25 Ultra»ni katta ekranli smartfonlar segmentida etalon sifatida ko‘rsatdi.
Eng yaxshi modellar
Katta ekranli eng yaxshi «iPhone» sifatida «Apple»ning «iPhone 17 Pro Max» modeli tan olindi. Mutaxassislar uni kuchli protsessor, 48 megapikselli barcha modullarga ega asosiy kamera tizimi va uzoq avtonom ish vaqti uchun yuqori baholadi.
«Eng yaxshi narx va imkoniyatlar nisbati» kategoriyasida g‘alaba «OnePlus»ning «OnePlus 15» modeliga nasib etdi. Smartfon 165 Hz yangilanish chastotali katta ekran, qudratli protsessor va sinfida eng tez zaryadlash texnologiyalaridan biri bilan ajralib turadi.
Katta smartfonlar orasida eng yaxshi kamera sifati bilan «Google»ning «Pixel 10 Pro XL» modeli ajralib chiqdi. U sun’iy intellekt asosidagi foto ishlov berish algoritmlari va «DxOMark» laboratoriyasiga ko‘ra eng yaxshi LTPO OLED ekran bilan jihozlangan.
Bozor tendensiyasi
Mutaxassislar alohida holda «Samsung»ning «Galaxy Z Fold 7» modelini ham qayd etdi. U eng yaxshi yig‘iluvchi smartfon sifatida baholanib, keng ish maydoni hisobidan planshet o‘rnini bosishi mumkin.
Ekspertlar fikricha, katta ekranli smartfonlar 2026 yilda ham yuqori talabda qoladi. Kontent iste’moli, mobil ish va o‘yin segmenti o‘sishi fon ida ishlab chiqaruvchilar aynan shu formatga ko‘proq e’tibor qaratmoqda.
