2026 yilda neft narxi arzonlashishi kutilmoqda – «Goldman»
Global tahlillarga ko‘ra, taklif ortishi va bozorda profitsit shakllanishi 2026 yilda neft narxlarini pasaytiradi.
«Goldman Sachs» 2026 yilda neft bozorida taklif keskin oshishi natijasida narxlar pasayishini prognoz qildi. «Reuters»da e’lon qilingan tahlilga ko‘ra, Rossiya, Venesuela va Eron bilan bog‘liq geosiyosiy xatarlar qisqa muddatli o‘zgaruvchanlikni saqlab qolishi mumkin.
Qayd etilishicha, «Goldman Sachs» investitsiya banki 2026 yil uchun o‘rtacha narx prognozini o‘zgartirmasdan qoldirdi. Unga ko‘ra, «Brent» va WTI nefti bir barreli mos ravishda 56 va 52 dollar atrofida shakllanadi. To‘rtinchi chorakda esa narxlar 54 va 50 dollargacha tushishi kutilmoqda, bu esa OECD mamlakatlarida zaxiralar ko‘payishi bilan bog‘liq.
«Goldman» tahlilchilari 2026 yilda kuniga 2,3 mln barrel hajmda bozor profitsiti yuzaga kelishini taxmin qilmoqda. Ularning fikricha, bu holat OPEKdan tashqari ishlab chiqarish o‘sishini sekinlashtirish va talabni qo‘llab-quvvatlash uchun narxlarning pasayishini talab qiladi. Bank katta miqyosli uzilishlar yoki OPEC tomonidan ishlab chiqarish qisqartirilishi kutilmayotganini ta’kidladi.
Hozirgi paytda «Brent» nefti taxminan 63 dollar, AQSHdagi WTI esa 59 dollar atrofida savdo qilinmoqda. O‘tgan yilda har ikki etalon ham 2020 yildan beri eng yomon yillik natijani ko‘rsatib, qariyb 20 foizga arzonlagan edi.
Bank AQSH siyosatchilari energiya ta’minoti barqarorligi va nisbatan past narxlarga ustuvor ahamiyat berishi oraliq saylovlar arafasida neft qimmatlashuvini cheklab turishini qayd etdi. Shu bilan birga, narxlar 2027 yildan bosqichma-bosqich tiklanishi, taklif sekinlashib, talab o‘sishi davom etishi mumkin.
«Goldman» 2027 yilda «Brent» va WTI o‘rtacha narxini 58 va 54 dollar darajasida baholadi. Uzoq muddatda esa, investitsiya yetishmasligi sabab talab o‘sishi natijasida 2030–2035 yillarda narxlar yana yuqorilashi mumkin.
Ma’lumot o‘rnida, «Goldman Sachs» — bu AQSHda joylashgan, dunyodagi eng yirik investitsion banklardan biri bo‘lib, investitsiya bankingi, aktivlarni boshqarish va moliyaviy konsalting xizmatlarini ko‘rsatadi. U xalqaro moliya bozorlarida yirik kompaniyalar, hukumatlar va investorlar uchun strategik va moliyaviy yechimlar taqdim etadi.
