Alfa Invest sug‘urta kompaniyasi 1,17 mlrd so‘mlik qo‘shimcha emissiyani amalga oshirmoqchi

Bu emissiya kompaniyaning beshinchi qo‘shimcha aksiyalar chiqarilishi hisoblanadi. Garchi hajm jihatidan bu qaror sug‘urta sektori kesimida juda yirik ko‘rinmasa-da, biroq u kompaniyaning kapital tuzilmasini bosqichma-bosqich yangilab borish strategiyasini yaqqol namoyon qiladi.

Sug‘urta bozorida odatda kapitalning o‘zi emas, balki kapital va majburiyatlar o‘rtasidagi nisbat hal qiluvchi ahamiyatga ega. «Alfa Invest» ustav kapitalini ketma-ket emissiyalar orqali oshirib borayotgani portfel hajmi va qabul qilinayotgan risklar kengayib borgani sari kapitalni ham shunga moslashtirayotganidan dalolat beradi. Natijada, kapital kompaniya faoliyatining joriy masshtabiga mutanosib tarzda yangilanib, regulyator talablari va risk-menejment siyosatiga mos holatda saqlanmoqda.

Aksiyadorlik jamiyati sifatida «Alfa Invest» uchun ustav kapitalini oshirishning asosiy huquqiy instrumenti aksiyalar emissiyasidir.

Sug‘urta kompaniyalari odatda kapitalni majburiyatlar hajmi ortganda, risklar kengayganda yoki regulyator talablarida o‘zgarishlar yuzaga kelganida ko‘tarishni ko‘rib chiqadi. Moliyaviy nuqtayi nazardan qaralganda, qarz instrumentlari, jumladan, obligatsiyalar sug‘urta sektorida kapital yetarliligini oshirmaydi, aksincha balansda majburiyatlar yukini ko‘paytiradi.

Shu sababli ustav kapitalini mustahkamlashda asosan equity instrumentlari, ya’ni qo‘shimcha aksiya emissiyalari qo‘llaniladi. «Alfa Invest»ning hozirgi qarori aynan shunday yondashuvga mos keladi.

Aksiyalar yopiq obuna orqali joylashtirilayotgani ularning ommaviy savdoga chiqarilmasligini va faqat cheklangan doiradagi investorlar o‘rtasida taqsimlanishini anglatadi. Bu tanlov kompaniya hozircha aksiyadorlik nazoratini ichki konturda saqlab qolishni afzal ko‘rayotganini ko‘rsatadi.

Sug‘urta biznesi uzoq muddatli majburiyatlarga asoslangan bo‘lgani sababli, aksiyadorlar bazasining barqarorligi va prognoz qilinishi korporativ boshqaruv nuqtayi nazaridan muhim omil hisoblanadi. Shu jihatdan yopiq obuna mexanizmi nazoratni tarqoq aksiyadorlar o‘rtasida yoyib yubormaslikka va strategik boshqaruvni bir maromda olib borishga xizmat qiladi.

Mazkur qaror «Alfa Invest» tarixida beshinchi qo‘shimcha emissiya sifatida qayd etilmoqda. Bu ustav kapitalidagi o‘zgarishlar bir martalik hodisa emas, balki kompaniya faoliyati davomida muntazam ravishda amalga oshirilayotgan jarayon ekanini ko‘rsatadi. Bunday ketma-ketlik kapital tuzilmasiga bozor sharoiti, portfel hajmi va risklar kengayib borgani sari kapitalni ham shunga moslashtirib borayotganini ko‘rsatadi.

«Alfa Invest» sug‘urta kompaniyasining 1,17 mlrd so‘mlik qo‘shimcha aksiyalar emissiyasi fond bozorida yangi erkin savdo ob’ektini yaratmaydi va qisqa muddatda bozor likvidligini oshirmaydi. Biroq sug‘urta sektorida ustav kapitalining yetarli va sifatli shakllangan bo‘lishi, uzoq muddatli majburiyatlarni bajarish va prudensial talablarni qondirish nuqtayi nazaridan, kompaniya barqarorligi uchun hal qiluvchi ahamiyatga ega.

G.Bozorova tayyorladi