AQSH «LUKOIL» bitimlariga ruxsatni uzaytirdi

AQSH Xorijiy aktivlarni nazorat qilish boshqarmasi — OFAC «LUKOIL» aktivlarini sotishga doir operatsiyalarga ruxsat beruvchi bosh litsenziya muddatini yana uzaytirdi.

Yangi qarorga ko‘ra, ushbu litsenziya 2026 yil 1-mayga qadar amal qiladi.

Bu mazkur hujjatning to‘rtinchi bor uzaytirilishi hisoblanadi. U kompaniya aktivlari bo‘yicha muzokaralar olib borish va shartli kelishuvlar tuzish imkonini saqlab qolmoqda.

Asosiy cheklovlar saqlanib qolmoqda

Biroq asosiy cheklovlar o‘zgarishsiz qolmoqda. Xususan, Rossiyaga har qanday pul o‘tkazmalari amalga oshirilishi taqiqlangan. Bu esa amalda bitimlarni to‘liq yakunlash va hisob-kitoblarni amalga oshirish jarayonini murakkablashtirmoqda.

Xalqaro loyihalar va kelishuvlar

Shu bilan birga, xalqaro maydonda «LUKOIL» ishtirokidagi loyihalar bo‘yicha harakatlar davom etmoqda. Jumladan, Iroq hukumati va Lukoyl o‘rtasida «G‘arbiy Kurna-2» neft konida operatorlik huquqini topshirish bo‘yicha kelishuv tasdiqlangan.

Bundan tashqari, kompaniya «Midad Energy» bilan hamkorlikka kelishgan. Unga ko‘ra, regulyatorlar ruxsati olingunga qadar aktivlar uchun to‘lov eskrou-hisobvarag‘ida saqlanishi rejalashtirilgan.

Shu bilan birga, OFAC Qozog‘istonning «LUKOIL» bilan qo‘shma loyihalardagi ulushlarni sotib olish bo‘yicha so‘rovini ham ko‘rib chiqmoqda.