AQSH Venesuela osmonini yopdi: Tramp keskin bayonot berdi

AQSH Prezidenti Donald Tramp Venesuela ustidagi havo makonini to‘liq «yopilgan» deb e’lon qilib, Janubiy Amerikadagi vaziyatga yangi siyosiy keskinlik olib kirdi. Uning Truth Social’dagi bayonoti Amerika ommaviy axborot vositalari tomonidan Janubiy Amerika bilan bo‘ladigan ehtimoliy qarama-qarshilikning yangi bosqichi sifatida baholandi.

Tramp o‘z murojaatida barcha aviakompaniyalar, uchuvchilar, narkoboshqaruv jarayonida qatnashuvchilar va odam savdosi bilan shug‘illanuvchi tuzilmalarga murojaat qilib, Venesuela ustidagi osmon «butunlay yopilgani»ni alohida ta’kidladi. Uning so‘zlariga ko‘ra, mazkur qaror favqulodda xavfsizlik choralaridan kelib chiqqan holda qabul qilingan.

«Parvozdan xoli hudud» e’lon qilinishi mamlakat uzra har qanday parvoz — u xoh tijorat, xususiy yoki xoh harbiy bo‘lsin, taqiqlanishini anglatadi. Bunday chora odatda harbiy operatsiyalar yoki keskin geosiyosiy bosim oldidan qo‘llaniladi. Shu jihatdan mutaxassislar Trampning bayonotini Vashingtonning Karakasga nisbatan bosimini yanada kuchaytirish sifatida talqin qilmoqda.

Venesuela hukumati hozircha rasmiy izoh bermadi, ammo mamlakat rasmiylari avval ham AQSHning bunday usullarini «suverenitetga aralashuv» deya tanqid qilgan. Karakas va Vashington o‘rtasidagi munosabatlar so‘nggi yillarda neft sanksiyalari, migratsiya krizisi va ichki siyosiy ziddiyatlar tufayli keskinlashgan edi.

AQSH harbiy tahlilchilariga ko‘ra, bu bayonot ehtimoliy harbiy operatsiyaga tayyorgarlik sifatida qaralishi mumkin. Agar Vashington osmonni yopishni amaliy darajaga olib chiqsa, Venesuela havo hududiga kirgan har qanday uchuvchi apparat «qonuniy nishon» deb baholanadi.