AQSHda xorijlik trak haydovchilar uchun yangi qoida joriy etildi

AQSH transport vazirligi va FMCSA yangi favqulodda qoida qabul qildi. Unga ko‘ra, endilikda xorijlik haydovchilar CDL olishi uchun cheklangan viza turlariga ega bo‘lishi shart. Yangi tartibga muvofiq, CDL faqat AQSH fuqarolari, Green Card egalari va H-2A, H-2B yoki E-2 vizasiga ega shaxslarga beriladi. Boshqa barcha vizalar asosida berilgan guvohnomalar davlat tizimidan chiqariladi. Hujjatning amal qilish muddati eng ko‘pi bilan 12 oyni tashkil qiladi va u to‘g‘ridan to‘g‘ri viza yoki yashash ruxsatnomasiga bog‘lanadi. Shu bilan birga, har bir CDL berish, yangilash yoki o‘zgartirishda SAVE tekshiruvi majburiy bo‘ladi. Yana bir muhim jihat — endi barcha yangilanishlar shaxsan amalga oshirilishi lozim, pochta yoki masofaviy tartibda qabul qilinmaydi. Haydovchilar inspeksiya paytida ingliz tilida muloqot qila olishi shart, aks holda darhol xizmatdan chetlatilishi mumkin. Federal idoralar yangi tartibga amal qilmagan kompaniyalarni kuzatuvga olishi mumkin. Bu esa katta moliyaviy va huquqiy tavakkalchiliklarni keltirib chiqaradi. Kompaniyalar qoidaga bo‘ysunishdan bosh tortsa, katta moliyaviy jarimalar, yuk kechikishi va hatto «xavfli tashuvchi» ro‘yxatiga kiritilishi mumkin. Xorijiy CDL haydovchilarini xizmatdan chiqarish kompaniyalar uchun qiyin qaror bo‘lsa-da, qonunbuzarlik ularni yanada katta xavf ostida qoldiradi. Yangi qoida ko‘plab yuk tashuvchi kompaniyalarga keskin ta’sir ko‘rsatishi mumkin.