Bandlik vazirligi «Air Samarkand»dan 1,5 mlrd so‘mlik maoshni talab qilmoqda

Bandlik va kambag‘allikni qisqartirish vazirligi Air Samarkand xususiy aviakompaniyasi xodimlariga uch oydan beri ish haqi to‘lanmayotgani bilan bog‘liq holatni nazoratga oldi. Vazirlik matbuot kotibi Gulnoza Alimovaning ma’lumot berishicha, xodimlar manfaatlarini himoya qilish maqsadida Samarqand shahar fuqarolik ishlari bo‘yicha sudiga da’vo arizasi kiritgan. Ma’lumotlarga ko‘ra, vazirlikka o‘nga yaqin xodimdan iyundan avgust oyigacha to‘lanmagan maoshlar bo‘yicha rasmiy shikoyat kelib tushgan. Davlat mehnat inspeksiyasi ularning talablarini qondirish maqsadida umumiy hisobda 1,5 milliard so‘m miqdorida da’vo arizasi tayyorlagan. Da’voda xodimlarga faqat qarzdorlik emas, balki Mehnat kodeksining 333-moddasiga muvofiq har bir kechikkan kun uchun kompensatsiya ham hisoblanishi ko‘zda tutilgan. Bu orqali ishchilarning huquqlari to‘liq himoya qilinishi kutilmoqda. Vazirlik shuningdek, aholini mehnat huquqlari buzilganda bevosita murojaat qilishga chaqirdi. Murojaatlar uchun 1176 ishonch raqami, (71) 200-06-00 telefonlari va maxsus Telegram-bot orqali aloqa qilish imkoniyati mavjud. Air Samarkand atrofidagi vaziyat keng muhokamaga sabab bo‘lmoqda. Masalan, ayrim xodimlar uzoq vaqt davomida nafaqat maosh, balki uy ijarasi va kundalik ehtiyojlari uchun ham mablag‘ ololmayotganini bildirgan. Sud jarayoni aviakompaniyaning kelgusi faoliyati va xodimlar manfaatlari uchun hal qiluvchi ahamiyatga ega.