Bolgariya Putin samolyoti uchun Yevropa osmonida maxsus koridor ajratishga tayyorligini bildirdi
Bolgariya Tashqi ishlar vaziri Georg Georgiyev Rossiya prezidenti samolyoti uchun NATO osmonidan o‘tishga ruxsat berishni «mantiqiy va zarur qadam» deb atadi.
Bolgariya hukumati Rossiya prezidenti Vladimir Putinning samolyoti Budapeshtdagi Donald Tramp bilan uchrashuvga borishi uchun havo yo‘lidan foydalanishiga ruxsat berishga tayyorligini bildirdi. Bu haqda mamlakat tashqi ishlar vaziri Georg Georgiyev Lyuksemburgda bo‘lib o‘tgan xalqaro ishlar bo‘yicha Kengash majlisida ma’lum qildi, deb yozadi Blitz agentligi.
Vazirning so‘zlariga ko‘ra, bu qaror «Ukrainada tinchlikka erishish uchun muhim diplomatik imkoniyat yaratish» maqsadini ko‘zlaydi.
«Qanday qilib uchrashuv o‘tkazish mumkin, agar ishtirokchilardan biri unga yetib bora olmasa?» — dedi Georgiyev.
Shu bilan birga, qo‘shni Ruminiya hozircha Rossiya tomonidan rasmiy parvoz so‘rovini olmaganini ma’lum qildi. Bu haqda Lyuksemburgdagi Yevropa Ittifoqi Kengashiga kelgan Ruminiya tashqi ishlar vaziri Oana Soyu bayonot berdi.
Biroq vaziyatni murakkablashtirayotgan omillar ham bor: Yevropa Ittifoqining amaldagi sanksiyalari Rossiya davlat samolyotlariga, jumladan prezidentlik Il-96 layneriga, Yevropa osmoni orqali parvoz qilishni taqiqlaydi.
Bundan tashqari, 2023 yil mart oyida Xalqaro jinoyat sudi Putinga nisbatan order bergani sababli Rim statutiga qo‘shilgan davlatlar uning samolyotini majburiy qo‘ndirish imkoniyatiga ega bo‘lishi mumkin.
Shu sababli, agar Bolgariya ruxsat bersa ham, Putinning Budapeshtga parvozi Yevropa osmonidagi siyosiy va huquqiy ziddiyatlar fonida o‘ta xavfli diplomatik missiyaga aylanishi mumkin.
