Farg‘onada 300 mln dollarlik zamonaviy shifoxona quriladi
Shifoxona 800 o‘ringa mo‘ljallangan bo‘lib, Saudiya kompaniyasi bilan hamkorlikda barpo etiladi.
© Соғлиқни сақлаш вазирлигиFarg‘ona viloyatida 800 o‘rinli zamonaviy ko‘p tarmoqli shifoxona qurish bo‘yicha yirik investitsiya loyihasiga start berildi. O‘zbekiston Sog‘liqni saqlash vazirligi ma’lumotiga ko‘ra, loyiha xalqaro standartlar asosida amalga oshiriladi.
Uch tomonlama kelishuv vazir Asilbek Xudayarov, “Vision International Investment Company” rahbari Omar Al-Midani va “KOS Construction Mekanik Elektrik Fe LLC” direktori Subutay Guzel tomonidan imzolandi. Loyiha qiymati qariyb 300 mln dollar bo‘lib, qurilish 36 oy davom etadi.
Zamonaviy tibbiyot markazi
Yangi tibbiyot majmuasi hududdagi beshta ixtisoslashtirilgan muassasani yagona kompleksga birlashtiradi. Bu orqali aholiga kardiojarrohlik, neyrojarrohlik, organ transplantatsiyasi, nefrologiya va ortopediya yo‘nalishlarida yuqori texnologiyali xizmatlar ko‘rsatiladi.
Shuningdek, 160 o‘rinli intensiv terapiya va shoshilinch tibbiy yordam bo‘limlari ham tashkil etiladi. Ilg‘or diagnostika va davolash infratuzilmasi joriy qilinishi xizmatlar sifatini oshirishi kutilmoqda.
Xalqaro hamkorlik va DXSH modeli
Mazkur loyiha davlat-xususiy sheriklik asosida amalga oshirilib, Xalqaro moliya korporatsiyasi va Germaniyaning Iqtisodiy hamkorlik va taraqqiyot federal vazirligi ko‘magida ishlab chiqilgan. U Markaziy Osiyodagi eng yirik tibbiyot obyektlaridan biriga aylanishi kutilmoqda.
Mutaxassislar fikricha, yangi shifoxona ishga tushgach, bemorlarning xorijda davolanishga bo‘lgan ehtiyoji kamayadi va tibbiy xizmatlar sifat jihatdan yangi bosqichga chiqadi.
