Fitch O‘zbekiston suveren reytingini «BB-»dan «BB»ga yangiladi

Fitch xalqaro reyting agentligi 2025 yil iyun oyida O‘zbekistonning chet el valyutasidagi suveren kredit reytingini «BB-»dan «BB» darajaga ko‘tardi. Agentlik bu qarorni mamlakatda olib borilayotgan iqtisodiy va institutsional islohotlar bilan izohladi. Jumladan, pul-kredit siyosatidagi qat’iylik, xususiylashtirish jarayoni va davlat boshqaruvida shaffoflikni oshirishga doir choralar yuqori baholandi. 2024 yilda energiya tariflarini erkinlashtirish va subsidiyalarni qisqartirish orqali davlat byudjeti kutilayotganidan yaxshiroq natija ko‘rsatgan. Fitch qayd etishicha, ushbu siyosat byudjetning barqarorligini ta’minlashda muhim ahamiyat kasb etdi. Jumladan, davlat byudjeti defitsiti YAIMning 3 foiz darajasida bo‘lib, rejalashtirilgan 4 foizdan kamroq bo‘lgan. Shu bilan birga, davlat qarzi darajasi 32 foiz atrofida ekani, valyuta zaxiralari esa 2025 yil 1 iyun holatiga ko‘ra 49,7 mlrd dollarga yetgani, O‘zbekistonning tashqi moliyaviy barqarorligini ta’minlayotgani qayd etilgan. Bu zaxiralar joriy tashqi to‘lovlarni 10 oyga qoplay oladi — bu BB reyting guruhidagi davlatlar o‘rtachasidan ikki barobar yuqori. Fitch'ning ta’kidlashicha, davlat korxonalari islohoti, xususiylashtirish jarayonlari va makroiqtisodiy islohotlar izchillik bilan amalga oshirilmoqda. Shuningdek, inflyatsiyani pasaytirishda Markaziy bankning qat’iy siyosati ijobiy natija berayotgani qayd etilgan — 2026 yilda inflyatsiya 7 foiz atrofida bo‘lishi kutilmoqda. Shu bilan birga, Fitch hali ham yirik xatarlar mavjudligini eslatadi: jumladan, Rossiyaga yuqori iqtisodiy bog‘liqlik (eksport va pul o‘tkazmalarning katta qismi), eksportning tovarlarga qaramligi va moliyaviy dollarlashuv darajasi. Bu reyting o‘zgarishi O‘zbekistonning xalqaro qarz bozoridagi mavqeini mustahkamlab, kelgusida investitsiya oqimlariga ijobiy ta’sir ko‘rsatishi mumkin.