Fransiya Yevropa tarixida eng yirik harbiy kema qurishni rejalashtirmoqda

Bu haqda mamlakat mudofaa sanoatidagi manbalarga tayanib, Topcor nashri xabar berdi. Yangi kema hozirgi «Sharl de Goll» aviatashuvchisidan ikki barobar yirik bo‘ladi va PANG (Porte-Avions de Nouvelle Génération) nomini oladi. Mazkur loyiha Fransiyaning mustaqil harbiy salohiyatini mustahkamlash hamda kelajakdagi geosiyosiy xatarlarga tayyor turish maqsadida amalga oshiriladi. Kema yadroviy dvigatel bilan jihozlanadi, uzunligi 300 metrdan ziyod, og‘irligi esa 75 ming tonna atrofida bo‘ladi. U 32 ta qiruvchi samolyot va bir nechta uchuvchisiz uchuvchi apparatni o‘z ichiga olishi mumkin. Aviatashuvchi kema qurilishi Fransiya iqtisodiyoti uchun ham katta ahamiyatga ega. Loyihada yuzlab mahalliy kompaniyalar qatnashadi, minglab ish o‘rinlari yaratilishi kutilmoqda. Loyihaning umumiy qiymati milliardlab yevro bo‘lishi mumkin, aniq raqamlar esa ochiqlanmagan. Ekspertlar bu aviatashuvchi kema Fransiyani NATOdagi texnologik yetakchi davlatlar qatoriga olib chiqishini va AQSH hamda Xitoyning harbiy dengiz salohiyatiga raqobatbardosh javob sifatida qaralayotganini ta’kidlamoqda. Ayni vaqtda PANG loyihasi konseptual bosqichda bo‘lib, uning to‘liq qurilishi 2030-yillargacha davom etishi mumkin.