G‘azoda faoliyat boshlagan GHF tanqidlar ostida qoldi

G‘azo mintaqasida yangi insonparvarlik yordam jamg‘armasi — GHF (Gaza Humanitarian Foundation) faoliyat yurita boshladi. AQSH va Isroil tashabbusi bilan tashkil etilgan mazkur jamg‘arma insonparvarlik yordamini tarqatishni maqsad qilgan. Biroq uning faoliyati boshlanishi bilanoq xalqaro tashkilotlar va mahalliy kuchlar tomonidan shubha va tanqidlarga uchradi. Jamg‘arma tarqatgan fotosuratlarda erkaklar noma’lum joydan yordam qutilarini olib ketayotgani aks etgan. VVS tomonidan jamg‘armaga yuk mashinalari soni yoki yordam olgan odamlar haqida savol yuborilgan, biroq hozircha javob berilmagan. GHF ma’lumotlariga ko‘ra, yordam asosan G‘azo janubidagi oz sonli tarqatish nuqtalari orqali amalga oshiriladi. Bu nuqtalar amerikalik pudratchilar tomonidan qo‘riqlanadi, perimetr bo‘ylab esa Isroil qo‘shinlari patrul qiladi. Olingan qutilar oziq-ovqat va gigiyena vositalaridan iborat. BMT va boshqa ko‘plab humanitar tashkilotlar GHF bilan hamkorlik qilishdan bosh tortgan. Ularga ko‘ra, ushbu tizim harakatlanishi cheklangan aholi uchun amaliy yordam ko‘rsatolmaydi, minglab fuqarolarni xavf ostiga qo‘yadi va yordam siyosiy va harbiy maqsadlarga yo‘naltirilishi mumkin. Norvegiya Qochqinlar kengashi bosh kotibi Yan Egeland GHFni «harbiylashtirilgan, xususiylashtirilgan va betaraflikdan yiroq» deb baholadi. Uning ta’kidlashicha, jamg‘arma ortida sobiq harbiylar va Markaziy razvedka boshqarmasining sobiq xodimlari turibdi. HAMAS esa falastinliklarga GHF bilan hamkorlik qilmaslik haqida ogohlantirdi. Ular bu tizimni «axborot quroliga aylangan, sun’iy ochlik siyosatini yurituvchi», deb hisoblashmoqda.