«Google» foydalanuvchilar ovozini yashirincha tinglagani uchun 68 mln dollar to‘laydi
Ovozli yordamchi orqali foydalanuvchilarning suhbatlari yozib olingani haqidagi da’vo AQSH sudida kelishuv bilan yakunlandi.
«Google» kompaniyasi smartfon foydalanuvchilarining maxfiyligini buzgani haqidagi da’voni hal qilish uchun 68 mln dollar to‘lashga rozi bo‘ldi. Mazkur ishda kompaniya ovozli yordamchisi orqali shaxsiy suhbatlarni noqonuniy ravishda yozib olish va ulardan maqsadli reklamada foydalanishda ayblangan, deya xabar qildi «Reuters».
Sud jarayoni
23-yanvar kuni AQSHning Kaliforniya shtati, San-Xose shahridagi federal sudga jamoaviy da’vo bo‘yicha dastlabki kelishuv taqdim etildi. Kelishuvni AQSH okrug sudi sudyasi Bet Labsen Friman tasdiqlashi lozim. Agar u ma’qullansa, ish rasman yakunlanadi.
Ayblov
Foydalanuvchilar «Alphabet» tarkibiga kiruvchi «Google»ni «Google Assistant» faollashgan paytda shaxsiy suhbatlarni yozib olganlikda aybladi. Da’vo arizalarida aytilishicha, ushbu ma’lumotlar keyinchalik maqsadli reklama tarqatishda qo‘llangan.
«Google Assistant» odatda «Salom, Google» yoki «OK, Google» kabi kalit so‘zlarga javob beradi. Ammo ayrim hollarda foydalanuvchilarning oddiy so‘zlari noto‘g‘ri ravishda kalit so‘z sifatida qabul qilinib, yordamchi faollashgan. Bu holat «soxta faollashtirish» deb atalib, natijada reklama e’lonlari paydo bo‘lgani da’vo qilingan. Tizim ishlash tamoyili jihatdan «Siri»ga o‘xshatilgan.
Kompaniya pozitsiyasi
«Google» har qanday qonunbuzarlikni rad etdi. Shu bilan birga, sud hujjatlariga ko‘ra, kompaniya sud jarayoni bilan bog‘liq xavf-xatar, xarajatlar va noaniqliklarni kamaytirish maqsadida kelishuvga borgan. Kelishuv 2016 yil 18-maydan keyin «Google» qurilmalarini sotib olgan yoki soxta faollashtirishga duch kelgan foydalanuvchilarga nisbatan amal qiladi.
