Hindiston va Pokiston dahanaki kurashga o‘tdi

Rajnat Singh Pokistonning yadroviy arsenali Atom energiyasi bo‘yicha xalqaro agentlik (AEXA) nazorati ostiga olinishi kerakligini ta’kidladi. Pokiston Tashqi ishlar vazirligi bu bayonotga javoban, Singhning so‘zlarini «chuqur xavotir va noaniqlik ifodasi» deb baholadi va AEXAning mandati haqidagi «befarqlik»ni tanqid qildi. Pokiston, shuningdek, Hindistonda yadroviy va radioaktiv materiallar bilan bog‘liq noqonuniy savdo va o‘g‘irlik holatlari haqida xalqaro hamjamiyatni ogohlantirdi. Bu tortishuvlar 22 aprelda Kashmirda sodir bo‘lgan terrorchilik hujumidan so‘ng boshlangan to‘rt kunlik harbiy to‘qnashuvlardan keyin yuzaga keldi. Hujumda 26 nafar fuqaro halok bo‘lgan va Hindiston bu hujumda Pokistonda joylashgan guruhlarni ayblagan. Pokiston esa bu ayblovlarni rad etgan. Mojaro avj olgan paytda AQSH prezidenti Donald Tramp ikki davlat o‘rtasida kutilmagan o‘t ochishni to‘xtatish kelishuvini e’lon qildi. Shunga qaramay, Hindiston bosh vaziri Narendra Modi yangi hujumlar bo‘lsa, chegara ortidagi terrorchi bazalarga qarshi yana zarba berishini va Pokistonning «yadroviy shantaji»ga bo‘ysunish niyati yo‘qligini bildirdi. Pokiston esa Modining bayonotini «provokatsion va xavfli» deb baholadi va bu kabi so‘zlar mintaqadagi tinchlikka tahdid solishini ta’kidladi. Shu bilan birga, Kashmirdagi Tral shahrida Hindiston politsiyasi uch nafar shubhali jangari yo‘q qilinganini, seshanba kuni yana uch nafar shubhali jangari janubiy Kashmir vodiysidagi to‘qnashuvda halok bo‘lganini ma’lum qildi.