Ilhom Haydarov Turkiyada O‘zbekistonning yangi elchisi sifatida ish boshladi

2025 yil 16 iyun kuni Ilhom Haydarov O‘zbekistonning Turkiyadagi yangi favqulodda va muxtor elchisi sifatida Anqaraga yetib keldi. Shu kuni u Turkiya Tashqi ishlar vazirligining Protokol departamenti rahbari, elchi Axmet Jemil Miraog‘luga ishonch yorliqlari nusxasini topshirdi. Tomonlar o‘rtasidagi muzokaralarda ikki mamlakat o‘rtasidagi strategik sheriklikni yanada chuqurlashtirish, xalqaro tashkilotlar, jumladan, 21−22 iyun kunlari Istanbulda bo‘lib o‘tadigan Islom hamkorlik tashkiloti Tashqi ishlar vazirlari kengashining 51-sessiyasidagi hamkorlik masalalari muhokama qilindi. Shuningdek, siyosiy maslahatlashuvlar, o‘zaro tashriflar, madaniy-gumanitar va turizm sohasidagi loyihalarni rivojlantirish, tadbirkorlik doiralari o‘rtasidagi aloqalarni faollashtirishga oid masalalar yuzasidan fikr almashildi. Axmet Jemil elchiga diplomatik faoliyatida muvaffaqiyat tilab, DEIK — Turkiyaning tashqi iqtisodiy aloqalar kengashi bilan yaqin hamkorlik qilishda yordam berishga tayyor ekanini bildirdi. Ilhom Haydarov — 56 yoshda. U 2024 yil iyulidan buyon O‘zbekiston Tashqi ishlar vazirining o‘rinbosari lavozimida ishlab kelayotgan edi. Ilgari Ukrainada elchi, «O‘zbekengilsanoat» rahbari va Respublika ish beruvchilar konfederatsiyasi raisi lavozimlarida faoliyat yuritgan. U ingliz va fransuz tillarini biladi. U Turkiyada 2017−2025 yillarda elchi bo‘lgan va keyin Senatning xalqaro masalalar bo‘yicha qo‘mitasiga rais etib saylangan Alisher Ag‘zamxo‘jayev o‘rnini egalladi.