Impichment xavfi: Tramp Grenlandiyani egallash rejasidan to‘xtaydimi?
«Reuters» ma’lumotiga ko‘ra, AQSH ma’muriyati Grenlandiya bo‘yicha kuch ishlatish g‘oyasidan voz kechdi, bunga Kongressda impichment boshlanishi mumkinligi haqidagi ogohlantirishlar sabab bo‘lgan.
AQSH ma’muriyati Grenlandiyani kuch ishlatish orqali qo‘lga kiritish masalasini kun tartibidan olib tashlagan. «Reuters» manbalarga ko‘ra, bunga prezident Donald Trampga nisbatan impichment xavfi yuzaga kelishi mumkinligi asosiy sabab bo‘lgan.
Yanvar oyi boshidanoq Tramp va uning yaqin atrofidagilar Grenlandiya bo‘yicha keskin ssenariylarni muhokama qilgan. Ayrim variantlarda harbiy kuch qo‘llash ehtimoli ham tilga olingan. Bu esa Kongressda, jumladan, respublikachi va demokratik partiya vakillari orasida jiddiy xavotir uyg‘otgan.
Qonun chiqaruvchilar prezident Kongress roziligisiz harbiy operatsiya boshlashi mumkinligini Venesuela bilan bog‘liq ssenariyga qiyos qilgan holda baholagan. Bu e’tirozlar ma’muriyatga ochiq yetkazilgan.
Kongress signali
«Reuters» manbalarining ta’kidlashicha, qonun chiqaruvchilar o‘z xavotirlarini davlat kotibi Marko Rubio va Oq uyning boshqa yuqori lavozimli amaldorlariga bildirgan. Respublikachilar tomonidan berilgan asosiy signal shundan iborat bo‘lgan: agar Grenlandiyaga nisbatan bosqin yoki harbiy harakat urinishi bo‘lsa, bu impichment jarayonini boshlab yuborishi mumkin.
Shu tariqa, ma’muriyat xavfni hisobga olgan holda, keskin variantlardan ortga chekingan. Manbalarga ko‘ra, bu qaror siyosiy barqarorlikni saqlash nuqtai nazaridan qabul qilingan.
Geosiyosiy fon
Tramp avval ham Grenlandiyani AQSH milliy xavfsizligi uchun muhim hudud sifatida ta’riflab kelgan. Uning fikricha, agar Vashington faollik ko‘rsatmasa, orol ustidan nazoratni Rossiya yoki Xitoy qo‘lga olishi mumkin.
Shu bilan birga, 22-yanvar kuni Tramp NATO bosh kotibi Mark Ryutte bilan muzokaralar o‘tkazgan. Tomonlar Grenlandiya bo‘yicha muayyan reja yuzasidan kelishuvga erishganini aytgan, ammo uning tafsilotlari oshkor etilmagan.
