«iPhone 18» kechikishi mumkin, ammo «Pro» modellar «Starlink» bilan internetga ulanishi kutilmoqda

«Apple»ning bu yoz uchun tayyorlayotgan «iPhone» rejasi oldingi yillardan ancha farq qiladi. Sizdirilgan ma’lumotlarga ko‘ra, «Apple» bu yil faqat uchta yuqori darajali modelni taqdim qiladi: «iPhone 18 Pro», «iPhone 18 Pro Max» va buklanadigan «iPhone Fold». Klassik «iPhone 18» modeli esa 2027 yil boshiga qolishi kutilmoqda. Bu holat foydalanuvchilar uchun tanlovni «Pro» yoki «Fold» nuqtasiga keltiradi.

«Pro» va «Pro Max» modellari odatda faqat ekran hajmi bilan ajralishi sababli, bu yilgi farq asosan «Pro» seriyasi va «Fold» o‘rtasida bo‘ladi. Bu farqda eng muhim jihatlardan biri kamera xususiyatlari hisoblanadi. So‘nggi da’volarga ko‘ra, «Apple» «Pro» modellarni, ayniqsa, kamera jihatidan ajratib ko‘rsatmoqchi.

Manbalarga ko‘ra, «iPhone 18 Pro» va «Pro Max» oldingi avlodga nisbatan ikki muhim kamera afzalligini taqdim etadi. Asosiy kamerada o‘zgaruvchan diafragma tizimi joriy qilinadi, telefotokamera esa kengroq diafragmaga ega bo‘ladi. Bu ayniqsa kam yorug‘likda yaxshiroq suratlar va ko‘proq elastik tushirish imkoniyatini beradi.

«Fold» kamerasida orqada qolmoqda

Buklanadigan «iPhone Fold»ning asosiy kamerasi «Pro» modellarga yaqin sifat taqdim qiladi, ammo o‘zgaruvchan diafragma funksiyasi faqat «Pro» seriyasiga xos bo‘ladi. Shuningdek, «Fold» modelda telefotokamera bo‘lmaydi; orqa tomonda faqat asosiy kamera va ultra keng burchakli kamera mavjud.

Bu holat, ayniqsa, fotosurat tushirishni istaydigan foydalanuvchilarni «Pro» modellarga yo‘naltirishi mumkin. Buklanadigan ekranning taqdim etayotgan boshqa tajribasi va rivojlangan kamera xususiyatlari orasida qoladigan foydalanuvchilar uchun bu yoz «iPhone»da an’anaviydan farqli tanlov davri bo‘lishi mumkin.

«iPhone 18 Pro» uchun sun’iy yo‘ldosh

Ma’lumotlarga ko‘ra, «Apple» «SpaceX» bilan muzokaralar olib borib, «Starlink» tarmog‘idan foydalanish orqali «iPhone 18 Pro» modellari uchun foydalanuvchi tomonidan qo‘shimcha uskuna talab etilmasdan to‘g‘ridan to‘g‘ri simsiz aloqa imkoniyatini taqdim etishni rejalashtirmoqda.

Hozircha «Apple» «Globalstar» kompaniyasining sun’iy yo‘ldosh infratuzilmasidan faqat «Acil Durum SOS» (Favqulodda holatdagi SMS) funksiyasi uchun foydalanadi. Bu tizim, mobil tarmoq yoki «Wi-Fi» qamrovi yo‘q bo‘lgan hududlarda ham foydalanuvchilarga favqulodda xizmatlar bilan aloqa qilish imkonini beradi. Shuningdek, «Globalstar» hamkorligi orqali «iPhone» foydalanuvchilari joylashuvini bo‘lishish va yaqinlari yoki tezkor yordam guruhlari bilan xabarlashish imkoniga ega.

«Globalstar» bilan hamkorlik zaiflashmoqda

Biroq «Apple» va «Globalstar» munosabatlari zaiflashmoqda. «Globalstar» boshqaruv kengashi raisi Jeyms Monro kompaniyani 10 milliard dollardan yuqori qiymatda sotish ehtimoli haqida so‘zlagani bu ajralishning belgisi sifatida ko‘rilmoqda. «Starlink»ning tez rivojlanishi esa bu jarayonni yanada tezlashtirmoqda.

Hozirgacha «Apple» «Globalstar»ga taxminan 2 milliard dollar investitsiya kiritgan bo‘lsa-da, uni sotib olish ehtimoli past. Bunga asosiy sabab – «Apple» mobil operator sifatida regulyator talablariga bog‘lanishni istamasligi. Shuning uchun «Apple» «Globalstar» orqali taqdim etilgan sun’iy yo‘ldosh xizmatlari uchun hali ham «iPhone» foydalanuvchilaridan to‘lov talab qilmaydi.

«Starlink» yo‘ldoshlari bilan to‘g‘ridan to‘g‘ri simsiz aloqa

«The Information» xabar qilishicha, «Apple» «Starlink»ning «direct to cell» (to‘g‘ridan to‘g‘ri mobil aloqa) texnologiyasini «iPhone 18 Pro» va «iPhone 18 Pro Max» modellariga joriy etish uchun «SpaceX» bilan muzokaralar olib bormoqda. Eng muhim jihati shuki, bu funksiya foydalanuvchi telefonlarida qo‘shimcha uskuna talab qilmaydi. Bu ma’lumot «Apple»ning 2026 yil atrofida sun’iy yo‘ldoshlar orqali 5G internet qo‘llab-quvvatlashini taqdim etishni rejalashtirayotgani haqidagi avvalgi xabarlar bilan ham muvofiq.

«Bloomberg» muxbiri Mark Gurmanga ko‘ra, yangi avlod «iPhone»lar «5G Non-Terrestrial Network» (NTN) texnologiyasini qo‘llab-quvvatlaydi. Bu texnologiya simsiz bazaviy stansiyalar qamrovini yo‘ldoshlar orqali kengaytirish imkonini beradi. Shuningdek, «Apple» ishlab chiquvchilarga ilova va dasturlariga sun’iy yo‘ldosh aloqasini integratsiya qilish uchun maxsus «API» taqdim etishni rejalashtirmoqda.

«SpaceX» tomonida muhim o‘zgarishlar

«SpaceX» «EchoStar»ning simsiz spektr aktivlarini 17 milliard dollarga xarid qilib, «Starlink» orqali smartfonlarga tezroq internet taqdim etish imkonini ochdi. «SpaceX» prezidenti Gvinn Shotvell sun’iy yo‘ldosh aloqasini to‘g‘ridan to‘g‘ri smartfonlarga integratsiya qilish uchun chip ishlab chiqaruvchilar bilan hamkorlik olib borilayotganini tasdiqladi.

Ikkinchi avlod «Starlink» yo‘ldoshlari «direct to cell» texnologiyasini qo‘llab-quvvatlaydi

Shuningdek, «SpaceX» AQSH Federal aloqa komissiyasidan (FCC) 15 000 ta ikkinchi avlod (Gen2) «Starlink» yo‘ldoshlarini ishga tushirish uchun ruxsat oldi. Bu ruxsat orqali kompaniya taxminan 7 500 ta yangi yo‘ldosh chiqarib, ikkinchi avlod flotini 15 000 yo‘ldoshga yetkazishi mumkin.

«Gen2 Starlink» yo‘ldoshlari 20 barobar yuqori ma’lumot uzatish qobiliyati, kam kechikish va standart smartfonlar bilan to‘g‘ridan to‘g‘ri aloqa kabi xususiyatlarni qo‘llab-quvvatlaydi. Shu nuqtai nazardan, «Apple» va «SpaceX» o‘rtasidagi hamkorlik mantiqan to‘g‘ri ko‘rinadi.