Islom Karimov hayoti va faoliyatiga chizgilar — Siyosat+ tahliliy dasturi

Siyosiy tizimga baho berish — bu davlat qanday boshqarilayotgani yoki boshqarilganini anglash, hokimiyat bo‘linmalari o‘rtasida muvozanat bor-yo‘qligini ko‘rish, xalq bilan hukumat o‘rtasidagi ishonch qay darajada ekanini tahlil qilish degani. Bu baho shaxsiy hissiyot yoki siyosiy simpatiyadan emas, balki qonun ustuvorligi, demokratik tamoyillar va boshqaruv samaradorligiga tayanadi. Siyosiy tizimni o‘rganish shuningdek, davlat va jamiyat o‘rtasidagi munosabatlarni, tizimning kuchli va zaif jihatlarini ochib berishdir. Chunki bu baho – faqat hukumatga emas, balki butun jamiyat qanday yo‘ldan ketayotganiga berilgan o‘lchovdir. O‘zbekistonning birinchi Prezidenti Islom Karimov nomi mamlakatning mustaqillik tarixi bilan chambarchas bog‘liq. U boshlagan davr – davlat boshqaruvi, siyosiy institutlar va fuqarolik jamiyati o‘rtasidagi munosabatlarning shakllanish bosqichi bo‘ldi. Bu tizim hozirgi kun siyosiy muhitiga ham o‘z ta’sirini saqlab qolgan. Shu bois Karimov davrini tahlil qilish – faqat o‘tmishni eslash emas, balki o‘sha davr tajribasidan xulosa chiqarib, bugungi siyosiy, iqtisodiy va ijtimoiy jarayonlarni yaxshiroq anglashga xizmat qiladi. Vaqt.uz’ning yangi «Siyosat+» tahliliy dasturining ilk sonida Islom Karimov davri siyosiy tizimining kuchli va zaif jihatlari tahlil qilinadi. Uning jamiyat hayotiga ta’siri, hukumat va xalq munosabatlarida qoldirgan izi va eng muhimi — bu tizimdan kelajak uchun qanday saboq olish mumkinligi haqida suhbatlashiladi. Bu safar biz faqat tarixga nazar tashlamaymiz — o‘tmish orqali bugunni va ertani anglashga urinamiz.